 |
| លោក គីម ជុងអ៊ុន និងលោក មូន ចេអ៊ីន ចាប់ដៃគ្នានៅបន្ទាត់ខណ្ឌចែកព្រំដែនប្រទេសកូរ៉េទាំងពីរ ក្នុងតំបន់គ្មានកងទ័ព ថ្ងៃទី២៧ មេសា ២០១៨ |
ចាប់ដៃគ្នារលាក់ប្រកបដោយស្នាមញញឹមនិងភាពស្និទ្ធស្នាល
មេដឹកនាំកូរ៉េខាងជើងនិងកូរ៉េខាងត្បូង
បានជួបគ្នាតាមការគ្រោងទុកនៅឯតំបន់គ្មានកងទ័ព ក្នុងភូមិ
Panmunjom នៅព្រឹកព្រលឹមថ្ងៃសុក្រនេះ។ មុនពេលចូលប្រជុំបិទទ្វារ
លោក គីម ជុងអ៊ុន ប្រមុខរបបក្រុងព្យុងយ៉ាង
បាននិយាយលេងសើចប្រាប់សមភាគីកូរ៉េខាងត្បូង គឺលោក មូន ចេអ៊ីន ថា
លោកនឹងលែងរំខានដំណេកលោកមូន ដោយសារការសាកល្បងមីស៊ីលទៀតហើយ។
ឆ្លងចូលទឹកដីកូរ៉េខាងត្បូងនៅតំបន់គ្មានកងទ័ពដែលបែងចែកឧបទ្វីបកូរ៉េជាពីរ
លោក គីម ជុងអ៊ុន និងលោក មូន ចេអ៊ីន
បានចាប់ដៃគ្នារលាក់ក្នុងទឹកមុខញញឹមស្រស់ស្រាយ។
ជានិមិត្តរូប
ប្រមុខដឹកនាំកូរ៉េខាងត្បូង គឺលោក មូន ចេអ៊ីន
បានឈានជើងរំលងបន្ទាត់ព្រំដែន ចូលទៅទឹកដីកូរ៉េខាងជើង
មុនពេលមេដឹកនាំកូរ៉េទាំងពីរ
ដឹកដៃគ្នាឆ្លងចូលទឹកដីកូរ៉េខាងត្បូងវិញ។ ទឹកដីកូរ៉េខាងត្បូង
ជាទីដែលលោកទាំងពីរ ត្រូវជួបប្រជុំកំពូលរួមគ្នាពេញមួយថ្ងៃ
នៅថ្ងៃសុក្រនេះ។
គួរជម្រាបថា នេះគឺជាលើកទី១ហើយ
ដែលមេដឹកនាំកូរ៉េខាងជើងឈានជើងជាន់ទឹកដីកូរ៉េខាងត្បូងក្នុងរយៈពេល៦៥ឆ្នាំចុងក្រោយ។
ពោលគឺរាប់ចាប់តាំងពីសង្គ្រាមកូរ៉េបិទបញ្ចប់មក
និងចាប់តាំងពីមានជំនួបកំពូលអន្ដរកូរ៉េមក។
ជំនួបអន្ដរកូរ៉េ២លើកមុន សុទ្ធសឹងតែធ្វើឡើងនៅទីក្រុងព្យុងយ៉ាង
រវាងលោក គីម ជុងអ៊ីល ជាមួយលោក គីម ដេ ជុង នៅឆ្នាំ២០០០ និងជាមួយលោក
រ៉ូ មូ យុន នៅឆ្នាំ២០០៧។ ជំនួបអន្ដរកូរ៉េទាំងពីរលើកនោះ
បិទបញ្ចប់ជាមួយកិច្ចព្រមព្រៀងជាប្រវត្តិសាស្ត្រមួយចំនួន
ប៉ុន្តែកិច្ចព្រមព្រៀងទាំងនោះមិនស្ថិតស្ថិរចីរកាលឡើយ។
នៅក្នុងជំនួបអន្ដរកូរ៉េលើកទី៣
នៅថ្ងៃសុក្រនេះ ប្រមុខដឹកនាំកូរ៉េទាំងពីរ
ត្រូវពិភាក្សាគ្នាអំពីការជម្រុះចោលកម្មវិធីនុយក្លេអ៊ែរកូរ៉េខាងជើង
ដើម្បីឈានទៅកសាងសន្តិភាពពិតប្រាកដនៅឧបទ្វីបកូរ៉េ។
មុនចូលប្រជុំបិទទ្វាររួមគ្នា លោក គីម ជុងអ៊ុន
បានថ្លែងទៅកាន់សមភាគីកូរ៉េខាងត្បូងថា
លោកនឹងលែងរំខានដំណេកលោកមូននទាំងកណ្ដាលអាធ្រាត
ដោយសារការសាកល្បងមីស៊ីលទៀតហើយ។
ចំណែកប្រធានាធិបតីកូរ៉េខាងត្បូង
លោក មូន ចេអ៊ីន វិញ។ លោកបានថ្លែងពីក្ដីរំភើបរីករាយរបស់លោក
ចំពោះជំនួបជាមួយលោក គីម នាពេលនេះ មុនពេលលោក គីម
សរសេរនៅក្នុងសៀវភៅក្រាំងមាសថា៖
ប្រវត្តិសាស្ត្រថ្មីចាប់ផ្ដើមហើយ។ លោក គីម
បានសន្យាធានាពីការតាំងចិត្តរបស់លោកថា
ការចរចារបស់លោកជាមួយសមភាគីកូរ៉េខាងត្បូង
នឹងប្រព្រឹត្តទៅយ៉ាងត្រង់ទៅត្រង់មក ស្មោះត្រង់
និងប្រកបដោយអត្ថន័យ។
ក្រៅពីកិច្ចប្រជុំកំពូលផ្លូវការ
មេដឹកនាំទាំង២នឹងរួមគ្នាដាំដើមស្រល់មួយដើម ជានិម្មិតរូបតំណាងឲ្យសន្តិភាព។
កិច្ចប្រជុំកំពូលអន្ដរកូរ៉េនាថ្ងៃសុក្រនេះ
នឹងបិទបញ្ចប់នាពេលល្ងាច ដោយការចុះហត្ថលេខាលើកតិកាសញ្ញាមួយ
ព្រមទាំងធ្វើការប្រកាសរួមគ្នាអំពីលទ្ធផលនៃជំនួបប្រជុំដ៏កម្រនេះ៕
ដោយ អ៊ឹម រចនា
RFI 27/04/2018
RFI 27/04/2018
Aucun commentaire:
Enregistrer un commentaire