|
មន្ត្រីគណបក្សប្រឆាំងបានអះអាងថាគណបក្សកាន់អំណាចបានបន្តបង្ខិតបង្ខំ
និងបញ្ចុះបញ្ចូលមន្ត្រីរបស់ខ្លួនឲ្យចុះចូលនៅថ្ងៃឱសានវាទចុងក្រោយគឺឲ្យបាននៅមុនថ្ងៃទី
១៦ ខែវិច្ឆិកាទៅតាមការកំណត់របស់លោកនាយករដ្ឋមន្ត្រី ហ៊ុន សែន
ខណៈសន្តិសុខត្រូវបានរឹតបន្តឹងគ្រប់ខេត្ត ដើម្បីរារាំង
និងមិនឲ្យសមាជិកថ្នាក់មូលដ្ឋានរបស់គណបក្សសង្គ្រោះជាតិឡើងមកកាន់រាជធានីភ្នំពេញ
ដើម្បីមកចូលរួមតវ៉ាប្រឆាំងសវនាការរំលាយគណបក្សសង្គ្រោះជាតិនៅថ្ងៃនេះ។
ពីរថ្ងៃចុងក្រោយមុនសវនាការរំលាយគណបក្សសង្គ្រោះជាតិដោយតុលាការកំពូល
មន្ត្រីបក្សប្រឆាំងនៅតាមខេត្តមួយចំនួនបានអះអាងថាមន្ត្រីរបស់ខ្លួនត្រូវបានបង្ខំឲ្យចុះចូលជាមួយគណបក្សប្រជាជន
ឬត្រូវបង្ខំឲ្យចុះកិច្ចសន្យាមិនឲ្យមកកាន់ទីក្រុងភ្នំពេញរហូតដល់ថ្ងៃទី
១៨ ខែវិច្ឆិកា។
លោក កែ ថៃ
ប្រធានប្រតិបត្តិគណបក្សសង្គ្រោះជាតិខេត្តកំពង់ឆ្នាំងបានឲ្យដឹងថាក្រុមប្រឹក្សាឃុំ
២ រូបត្រូវបានប៉ូលិសឃាត់សួរនាំ និងឲ្យផ្ដិតមេដៃសន្យាថា
នឹងមិនធ្វើដំណើរមកភ្នំពេញទេគិតត្រឹមថ្ងៃទី ១៧ ខែវិច្ឆិកា។
លោកបញ្ជាក់ថា ជំទប់ទី ២ ឃុំកំពង់អុស ស្រុកជលគិរី
ត្រូវបានប៉ូលិសខេត្តឃាត់ខ្លួនឲ្យធ្វើកិច្ចសន្យា។ «លោក សោម
វុនគាត់ធ្វើដំណើរមកបើកលុយនៅក្រុងកំពង់ឆ្នាំង។
តែនគរបាលបានឃាត់គាត់ជិត ៤ ម៉ោង។
ក្រោយមកយើងបានធ្វើកិច្ចសន្យាថាមិនមកភ្នំពេញទេ
ហើយគេក៏ដោះលែងវិញ»។
ចំណែកអនុប្រធានប្រតិបត្តិគណបក្សសង្គ្រោះជាតិប្រចាំស្រុកកំពង់ត្របែក
ខេត្តព្រៃវែង លោក គង់ សុភ័ណ្ឌ
ត្រូវបានសមត្ថកិច្ចដាក់កម្លាំងរារាំងមិនឲ្យលោកចេញពីផ្ទះ។
លោក គីន លឹង
ប្រធានគណៈកម្មការប្រតិបត្តិខេត្តរបស់គណបក្សសង្គ្រោះជាតិថ្លែងថា៖
«ប៉ូលិសកំពុងនៅផ្ទះគាត់បួនដប់នាក់ គេមិនឲ្យគាត់ចេញ។
ខ្ញុំហៅគាត់មកគាត់មិនហ៊ានមកទៀតគាត់ថាបើចេញគេចាប់ហើយ។
ប៉ូលិសឲ្យហៅប្រធានប្រតិបត្តិស្រុក ឡុង ផារី មកផ្តិតមេដៃសន្យាថា
មិនឲ្យមានកម្លាំងឡើងមកភ្នំពេញ»។
«រាល់ថ្ងៃមានគ្រប់កន្លែងទាំងអស់ដែលគេឲ្យផ្តិតមេដៃកុំឲ្យឡើងទៅភ្នំពេញ»។
លោកបន្តថាកាលពីថ្ងៃទី ១៤ វិច្ឆិកា សមាជិកក្រុមប្រឹក្សា ២
នាក់ត្រូវបានសមត្ថកិច្ចឃាត់ខ្លួនឲ្យចុះកិច្ចសន្យាមិនឲ្យមកចូលប្រមូលផ្តុំនៅភ្នំពេញ។
បើតាមលោក លឹង គិតត្រឹមថ្ងៃម្សិលមិញមានមន្ត្រីសង្គ្រោះជាតិ ២១
រូបបានចុះចូលជាមួយគណបក្សប្រជាជន។
ដោយឡែកអង្គការអាដហុកប្រចាំខេត្តកំពតបានរាយការណ៍ថាមេឃុំ
និងក្រុមប្រឹក្សា ៣ រូបពីឃុំកំពង់ត្រាចខាងលិច
និងឃុំបឹងសាលាខាងជើង ក្នុងស្រុកកំពង់ត្រាច
ត្រូវបានប៉ូលិសហៅចូលអធិការដ្ឋាននគរបាលស្រុក
រួចហើយពួកគេត្រូវបានបញ្ជូនទៅស្នាក់ការគណបក្សប្រជាជនស្រុកហើយមន្ត្រីទាំង
៣ ក៏ត្រូវបានបង្ខំឲ្យចុះចូលជាមួយគណបក្សកាន់អំណាច។
ប៉ុន្តែលោក សេង សុគុណចាន់ អធិការស្រុកកំពង់ត្រាចបដិសេធដោយអះអាងថា
«អត់ទេ គាត់ទាំង ៣ នាក់មកចុះចូលដោយស្ម័គ្រចិត្តដោយខ្លួនឯងទេ
គ្មានអ្នកណាទៅបង្ខំគាត់ទេ។ ថ្ងៃនេះក្រុមប្រឹក្សា ៩
នាក់ទៀតមកចុះចូលដោយសារគាត់ដឹងពីទង្វើមេបក្សរបស់ខ្លួន»។
ស្នងការខេត្តកំពតលោក ម៉ៅ ច័ន្ធមធុរិទ្ធ
ថ្លែងថានៅខេត្តរបស់លោកការដាក់កន្លែងត្រួតពិនិត្យនេះគឺគ្រាន់តែត្រូវពិនិត្យចរាចរណ៍ធម្មតាតែប៉ុណ្ណោះ។
ប៉ុន្តែលោកបានប្រាប់ទៅអធិការនគរបាលទូទាំងខេត្តឲ្យពន្យល់ណែនាំពលរដ្ឋកុំឲ្យមកចូលរួមបាតុកម្មនៅភ្នំពេញ។
នៅខេត្តប៉ៃលិនវិញលោកស្រី វ៉ែន តារា
ប្រធានប្រតិបត្តិគណបក្សសង្គ្រោះជាតិខេត្តនេះបានឲ្យដឹងថាមិនមានមន្ត្រីរបស់ខ្លួនណាម្នាក់ចុះចូលជាមួយបក្សកាន់អំណាចទេ
ប៉ុន្តែលោកស្រីថ្លែងថាមន្ត្រីគណបក្សប្រជាជនបានបញ្ចុះបញ្ចូល
និងបង្ខំឲ្យមន្ត្រីបក្សប្រឆាំងក៏ដូចជារូបលោកស្រីផ្ទាល់ឲ្យចុះចូល។
«ខ្ញុំឲ្យកូនចៅខ្ញុំដើរគេចអស់ហើយ។ គេមកហៅខ្ញុំសុំជួប ២
ដងហើយគេនិយាយអូសទាញ
គេថាស្រឡាញ់ខ្ញុំ...ឲ្យខ្ញុំចូលមករួមការងារជាមួយគ្នាទៅ»។
លោក សុខ ឥសាន អ្នកនាំពាក្យគណបក្សប្រជាជនកម្ពុជាមិនអាចទាក់ទងសុំអធិប្បាយបានទេកាលពីម្សិលមិញ។
ខណៈពេលជាមួយគ្នានេះកម្លាំងសមត្ថកិច្ចនៅតាមខេត្តផ្សេងៗក៏ដូចជានៅរាជធានីភ្នំពេញបានត្រៀមកម្លាំងរួចរាល់ដើម្បីការពារសន្តិសុខ
ឬទប់ស្កាត់បាតុកម្មណាមួយ។ នៅខេត្តបាត់ដំបងឯណោះវិញកម្លាំងប៉ូលិស
និងយោធាបានល្បាតនៅទីសាធារណៈក្បែរស្នាក់ការគណបក្សសង្គ្រោះជាតិ។
លោក សុខ ពេញវុធ
អភិបាលខណ្ឌដូនពេញកាលពីម្សិលមិញបានណែនាំកម្លាំងសមត្ថកិច្ចខណ្ឌប្រហែល
២៥០
នាក់ឲ្យមានការប្រុងប្រយ័ត្ននៅពេលតុលាការកំពូលបើកសវនាការសំណុំរឿងរំលាយគណបក្សសង្គ្រោះជាតិនៅថ្ងៃនេះ៕
នៀម ឆេង ភ្នំំពេញ ប៉ុស្តិ៍
Thu, 16 November 2017
Thu, 16 November 2017
Aucun commentaire:
Enregistrer un commentaire