អាជ្ញាធរក្រុងភ្នំពេញ
បានដាក់ពង្រាយកម្លាំងនៅគ្រប់ច្រកផ្លូវចូលមកកាន់រាជធានីភ្នំពេញស្ទើរតែទាំងស្រុង
ចាប់តាំងពីព្រឹកព្រលឹម ថ្ងៃទី ១៦ វិច្ឆិកា
ខណៈដែលតុលាការកំពូលបានបើកសវនការរំលាយគណបក្សសង្រ្គោះជាតិនៅថ្ងៃនេះ។
លើសពីនេះ នៅជុំវិញបរិវេណតុលាការកំពូលក្នុងរង្វង់ជាង៥០០ម៉ែត្រ
អ្នកដែលគ្មានភារកិច្ចមិនត្រូវបានអនុញ្ញាតឲ្យចូលជាដាច់ខាត។ នេះ
ជាវិធានការដើម្បីទប់ស្កាត់ការជួបជុំតវ៉ារបស់ក្រុមអ្នកគាំទ្រគណបក្សសង្រ្គោះជាតិ
ប្រឆាំងនឹងសវនាការរំលាយគណបក្សសង្រ្គោះជាតិ។
ប៉ុន្តែផ្ទុយពីការគ្រោងទុក
មិនមានការជួបជុំណាមួយកើតឡើងនោះឡើយ។
មិនមានការជួបជុំណាមួយកើតឡើង
នៅថ្ងៃដែលតុលាការកំពូលបានបើកសវនាការរំលាយគណបក្សសង្រ្គោះជាតិ
នៅថ្ងៃទី១៦ វិច្ឆិកា នេះទេ។ មិនថា នៅមុខតុលាការកំពូល
ដែលស្ថិតនៅក្បែរព្រះបរមរាជវាំង ឬ
នៅទីស្នាក់ការកណ្តាលគណបក្សសង្រ្គោះជាតិ
ដែលស្ថិតនៅសង្កាត់ចាក់អង្រែលើ ក្រុងភ្នំពេញ
គឺមិនឃើញមានការជួបជុំពីសំណាក់អ្នកគាំទ្រគណបក្សសង្រ្គោះជាតិ
ដូចការព្រួយបារម្ភរបស់អាជ្ញាធរនោះទេ។ បើតាមសេចក្តីរាយការណ៍
នៅឯទីស្នាក់ការគណបក្សសង្រ្គោះជាតិ គឺមិនមានតំណាងរាស្រ្ត
ឬមន្រ្តីជាន់ខ្ពស់គណបក្សណាម្នាក់
បានស្ថិតនៅក្នុងទីស្នាក់ការគណបក្សសង្រ្គោះជាតិឡើយ ពោលគឺ
គេឃើញមានតែសន្តិសុខពីរបីនាក់ដែលយាមប្រចាំនៅទីស្នាក់ការដែលស្ងាត់ជ្រងំ
និងក្រុមអ្នកសារព័ត៌មានពីរបីនាក់ ដែលរងចាំតាមដានយកព័ត៌មាន
នៅឯទីស្នាក់ការគណបក្សនេះតែប៉ុណ្ណោះ។
គួរជំរាបជូនថា
សន្តិសុខត្រូវបានរឹតបន្តឹងយ៉ាងណែន នៅថ្ងៃទី ១៦ វិច្ឆិកា
ជាថ្ងៃដែលតុលាការកំពូលបើកសវនការរំលាយគណបក្សសង្រ្គោះជាតិ
តាមបណ្តឹងក្រសួងមហាផ្ទៃ កាលពីថ្ងៃទី ០៦ តុលា។
នៅតាមច្រកផ្លូវសំខាន់ៗ ចូលមកកាន់រាជធានីភ្នំពេញ
ត្រូវបានអាជ្ញាធរបានដាក់បារាស់តាំងពីព្រឹកព្រលឹមស្រាងៗ
ដើម្បីត្រួតពិនិត្យទៅលើរថយន្តនិងអ្នកធ្វើដំណើរមកពីបណ្តាខេត្តនានា។
ដោយឡែកនៅជុំវិញបរិវេណតុលាការកំពូលឯណោះវិញ
ចរាចរណ៍ត្រូវបានបិទទាំងស្រុងនៅក្នុងរង្វង់ជាង៥០០ម៉ែត្រពីតុលាការកំពូល
ខណៈដែលអ្នកសារព័ត៌មានស្រ្តីម្នាក់ដែលអះអាងថា
ជាអតីតបុគ្គលិកវិទ្យុសម្លេងសហរដ្ឋអាមេរិក (VOA)
រួមទាំងអ្នកសង្កេតការណ៍សិទ្ធិមនុស្សរបស់អង្គការសហប្រជាជាតិពីរនាក់
ត្រូវបានបណ្តេញចេញពីបរិវេណបន្ទាត់ក្រហម
ដោយសារតែមិនមានប័ណ្ណអនុញ្ញាត។ ស្រ្តីអ្នកកាសែតរូបនោះ
ត្រូវបានអាជ្ញាធរបញ្ជូនខ្លួនទៅសាកសួរបន្តនៅក្នុងខណ្ឌដូនពេញ។
ទាក់ទងនឹងវិធានការរឹតបន្តឹងសន្តិសុខយ៉ាងណែននេះ
ត្រូវបាននាយឧត្តមសេនីយ៍ ជួន សុវណ្ណ អគ្គស្នងការរងនគរបាលជាតិ
និងជាស្នងការនគរបាលរាជធានីភ្នំពេញថ្លែងថា
គឺដើម្បីការពារសន្តិសុខ និងសណ្តាប់ធ្នាប់
ដើម្បីឲ្យសវនាការរបស់តុលាការកំពូល លើការរំលាយ គណបក្សសង្គ្រោះជាតិ
បានដំណើរការទៅដោយរលូនមិនមានការរំខានណាមួយ។ ហើយថា
ការដាក់ពង្រាយកម្លាំងសមត្ថកិច្ចទាំងនេះ
មិនមានគោលបំណងបំភ័យដល់ប្រជាពលរដ្ឋនោះឡើយ។
គួរបញ្ជាក់ដែរថា តាំងពីយប់ថ្ងៃទី១៥ វិច្ឆិកា មកម៉្លេះ
អាជ្ញាធរនៅតាមបណ្តាខណ្ឌមួយចំនួនបានចុះធ្វើរដ្ឋបាលទាំងយប់
តាមអង្គការ សមាគមក្រៅរដ្ឋាភិបាលមួយចំនួន និងតាមផ្ទះសំណាក់ផងដែរ
ដោយបារម្ភថា នឹងមានសមាជិកគណបក្សសង្គ្រោះជាតិ
មកពីតាមខេត្តចូលមកស្នាក់នៅ។
ក្នុងនោះអាជ្ញាធរបានចុះទៅធ្វើរដ្ឋបាលនៅ
អង្គការសិទ្ធិមនុស្សលីកាដូ មជ្ឈមណ្ឌលសិទ្ធិមនុស្សកម្ពុជា (CCHR)
អង្គការខុមហ្វ្រែល និងសមាគមសិទ្ធិមនុស្សអាដហុកជាដើម។ លោកអំ សំអាត
ប្រធានផ្នែកបច្ចេកទេសស៊ើបអង្កេតអង្គការលីកាដូ បានបញ្ជាក់ថា
អាជ្ញាធរខណ្ឌចំការមន បានចុះសួរនាំថា
តើមានមនុស្សចូលមកស្នាក់នៅទេ៕
វ៉ា សំណព្វ
16/11/2017 rfi
16/11/2017 rfi
Aucun commentaire:
Enregistrer un commentaire