 |
| រូបកុមារតំណាងឲ្យកុមារទទួលរងអំពើហិង្សា។ ផា លីណា |
ភ្នំពេញៈ កុមារកម្ពុជា ៧៥ ភាគរយគឺជាង ១ លាននាក់បានជួបប្រទះនឹងអំពើហិង្សាយ៉ាងហោចណាស់មួយទម្រង់មុនពេលពួកគេមានអាយុ ១៨ ឆ្នាំ ហើយទទួលរងនូវការខាតបង់សេដ្ឋកិច្ចជាទឹកប្រាក់ចំនួន ១៦១ លានដុល្លារអាមេរិក ខណៈដែលកុមារប្រមាណជា ១.៧ ពាន់លាននាក់នៅទូទាំងពិភពលោកទទួលរងនូវអំពើហិង្សារៀងរាល់ឆ្នាំ។ នេះបើតាមរបាយការណ៍របស់អង្គការមូលនិធិអង្គការសហប្រជាជាតិសម្រាប់កុមារ (UNICEF)។
របាយការណ៍ដែលត្រូវបានធ្វើឡើងតាំងពីឆ្នាំ ២០១៣ ទាក់ទងនឹងអំពើហិង្សាលើកុមារនេះត្រូវបានបង្ហាញក្នុងកម្មវិធីបើកយុទ្ធនាការមួយមានឈ្មោះថា «ItTake a World»នៅប្រទេសកម្ពុជាដើម្បីបញ្ឈប់អំពើហិង្សាលើកុមារដែលត្រូវបានរៀបចំឡើងដោយអង្គការទស្សនៈពិភពលោក និងអង្គការ Vision Fund ដោយមានភាគីពាក់ព័ន្ធពីរដ្ឋាភិបាល និងសង្គមស៊ីវិលជិត ២០០ នាក់ចូលរួមកាលពីម្សិលមិញ។
លោកស្រីបណ្ឌិត Jill Reimer ប្រធានបច្ចេកទេសផ្នែកអប់រំ និងបំណិនជីវិតរបស់អង្គការទស្សនៈពិភពលោកបានឲ្យដឹងថា កុមារទទួលរងអំពើហិង្សាពេលនៅផ្ទះ និង នៅសាលារៀនដែលគួរតែជាកន្លែងដែលពួកគេមានអារម្មណ៍ថា មានសុវត្ថិភាពបំផុត ប៉ុន្ដែផ្ទុយទៅវិញកន្លែងទាំងនេះកុមារតែងតែទទួលរងវិន័យដោយមានការប្រើហិង្សាពីឪពុកម្ដាយ អាណាព្យាបាល និងគ្រូបង្រៀន។ ការធ្វើបែបនេះអាចប៉ះពាល់យូរអង្វែងទៅលើពួកគេ។
លោកស្រីបញ្ជាក់ថា៖ «យើងដឹងពីការស្រាវជ្រាវសកលថាអំពើហិង្សាមានឥទ្ធិពលអាក្រក់ទៅលើការអភិវឌ្ឍខាងផ្នែកសតិអារម្មណ៍ផ្លូវចិត្ត និងភាសាររបស់កុមារ។ យើងក៏ដឹងថាអំពើហិង្សាអាចមានផលប៉ះពាល់អវិជ្ជមានដល់ទំនាក់ទំនងសង្គម និងការសិក្សារបស់កុមារផងដែរ»។
លោកស្រី ខៀវ បូរី រដ្ឋលេខាធិការនៃក្រសួងសង្គមកិច្ច អតីតយុទ្ធជន និងយុវនីតិសម្បទាឲ្យដឹងពីម្សិលមិញថាកត្តាសំខាន់ដែលបានជះឥទ្ធិពលដល់ការអប់រំកុមារ និងមានអំពើហិង្សាលើកុមារនោះគឺបណ្ដាលមកពីសីលធម៌សង្គម និងចំណេះដឹងរបស់ពលរដ្ឋនៅមានកម្រិត។ ដូច្នេះការប្រៀនប្រដៅកូនចៅប្រើទៅតាមអារម្មណ៍ និងមិនមានវិធីសាស្ត្រល្អៗសម្រាប់អប់រំកុមារ។
លោកស្រីបញ្ជាក់ថា៖ «យើងនៅពិបាកក្នុងការបន្ទោសពួកគាត់ដោយសារពួកគាត់រស់នៅក្នុងដំបូលមេគ្រួសារដែលមិនសូវមានចំណេះដឹងគ្រប់គ្រាន់ ក្នុងការអប់រំកូន ឬគ្មានវិធីសាស្ត្រអប់រំ ប៉ុន្ដែក៏អាចមានគ្រួសារខ្លះ គាត់មិនសូវមានពេលទំនេរអប់រំ ឬតាមដានសកម្មភាពកូន ព្រោះរវល់ការងារ ឬប្រកបរបរចិញ្ចឹមគ្រួសារដែរ ហើយយើងក៏មិនអាចបន្ទោសពួកគាត់ទាំងស្រុងបានដែរ តែយ៉ាងណាយើងក៏អំពាវនាវឲ្យមានការតាមដានសកម្មភាពកុមារ និងយកចិត្តទុកដាក់ទៅលើពួកគាត់ឲ្យបានច្រើនផង»។
អ្នកស្រី ជា លីដា ប្រធានយុទ្ធនាការ It Takes a World នៃអង្គការទស្សនៈពិភពលោកប្រចាំនៅកម្ពុជាបានឲ្យដឹងថាកុមារដែលរស់នៅជាមួយឪពុកម្ដាយដែលតែងតែប្រើអំពើហិង្សាអាចក្លាយជាឪពុកម្ដាយដែលប្រើអំពើហិង្សាដូចគ្នានៅពេលដែលពួកគេធំឡើង ដែលនេះជាការបន្ដវដ្ដ (ត្រាប់តាមគ្នា) នៃការរំលោភបំពាន។ នៅពេលដែលអំពើហិង្សាត្រូវបានគេទទួលយក និងគិតថាជារឿងធម្មតានៅក្នុងបរិបទគ្រួសារ ហើយការប្រើអំពើហិង្សាអាចត្រូវបានទទួលយកនៅសាលា និងសហគមន៍ទាំងមូលផងដែរ។
អ្នកស្រីបញ្ជាក់ថា៖ «យើងចាំបាច់ត្រូវចាប់ផ្ដើមការសន្ទនាអំពីអំពើហិង្សាលើកុមារ និងផ្លាស់ប្ដូរជំនឿ និងអាកប្បកិរិយាដែលបង្កគ្រោះថ្នាក់ដល់កុមារ ដោយមានតែតាមរយៈការធ្វើរួមគ្នានោះទេ ទើបយើងអាចបញ្ឈប់អំពើហិង្សាលើកុមារបាន»។
បើយោងតាមរយបាយការណ៍ខាងលើចាប់តាំងពីឆ្នាំ ២០១៣ បង្ហាញថា ការស្ទង់មតិថ្នាក់ជាតិមួយបានបង្ហាញថាកុមារកម្ពុជាច្រើនជាង ៥០ ភាគរយទទួលរងនូវអំពើហិង្សាលើរូបរាងកាយ ២០ ភាគរយទទួលរងអំពើហិង្សាផ្នែកផ្លូវចិត្ត និងប្រមាណជា ៥ ភាគរយទទួលរងអំពើហិង្សាផ្នែកផ្លូវភេទ។
លើសពីនេះ កម្ពុជា ទទួលរងការខាតបង់សេដ្ឋកិច្ចជាទឹកប្រាក់ចំនួន ១៦១ លានដុល្លារអាមេរិក ឬប្រមាណជា ១,១០% នៃផលិតផលក្នុងស្រុកសរុបរបស់ខ្លួនដែលជាផលវិបាកផ្នែកសុខភាពបណ្ដាលមកពីអំពើហិង្សាលើកុមារ៕
Tue, 21 November 2017
Aucun commentaire:
Enregistrer un commentaire