ចៅក្រមសាលាដំបូងរាជធានីភ្នំពេញ លោក ឡុង សេកភិរម្យ សម្រេចផ្ដន្ទាទោស តំណាងសហគមន៍បឹងកក់ អ្នកស្រី ទេព វន្នី ដាក់ពន្ធនាគារចំនួន ២ឆ្នាំកន្លះ ក្រោមបទចោទថា ប្រើហិង្សាលើសន្តិសុខសណ្ដាប់ធ្នាប់សាលាខណ្ឌដូនពេញ នៅក្បែរផ្ទះលោកនាយករដ្ឋមន្ត្រី ហ៊ុន សែន កាលពីខែមីនា ឆ្នាំ២០១៣។
ក្នុងពេលសវនាការជំនុំជម្រះនៅព្រឹកថ្ងៃទី២៣ កុម្ភៈ សហគមន៍បឹងកក់ បានប៉ះទង្គិចគ្នាមួយប្រាវជាមួយសន្តិសុខខណ្ឌ៧មករា បណ្ដាលឲ្យមនុស្ស ៤នាក់របួស នៅខាងមុខសាលាដំបូងរាជធានីភ្នំពេញ។
ការប៉ះទង្គិចគ្នានេះបណ្ដាលឲ្យសកម្មជនបឹងកក់ លោកស្រី បូវ សោភា រងរបួសធ្ងន់ត្រង់ក្បាលនិងជើង កញ្ញា សុង ស្រីលាភ ត្រូវបានកងសន្តិសុខចាប់សែងដោយវាយទាត់ធាក់ ក្នុងបំណងបញ្ចៀសកុំឲ្យក្រុមស្ត្រីបឹងកក់ ឈរតវ៉ាខាងមុខតុលាការតទៅទៀត។ ចំណែកបុរសម្នាក់ ឈ្មោះ ម៉ៅ សុជាតិ ជាពលរដ្ឋដែលឈរមើលការតវ៉ា ក៏រងរបួសដែរ ដោយសារលោកបានឃាត់កងសន្តិសុខកុំឲ្យប្រើហិង្សាលើស្ត្រីបឹងកក់។ លោកត្រូវបានក្រុមសន្តិសុខតាមវាយរហូតដល់ក្នុងផ្សារទំនើបស៊ីធីមល (City Mall)។
ក្រុមសហគមន៍បឹងកក់ ប្រមាណ ៣០នាក់ នាំគ្នាតវ៉ាដោយមានពាក់ម៉ាស់មុខពណ៌ខ្មៅ លើកបដាទាមទារឲ្យដោះលែងអ្នកស្រី ទេព វន្នី។ ពួកគាត់អះអាងថា ការពាក់ម៉ាស់ពណ៌ខ្មៅនេះ ចង់បង្ហាញថា អ្នកដែលនិយាយច្រើនពាក់ព័ន្ធនឹងបញ្ហាអយុត្តិធម៌សង្គមអាចប្រឈមនឹងការជាប់ពន្ធនាគារ។
សកម្មជនបឹងកក់ អ្នកស្រី បូវ សោភា ដែលរងរបួសពេលប៉ះទង្គិចជាមួយសន្តិសុខខណ្ឌ៧មករា ខាងមុខតុលាការរាជធានីភ្នំពេញ នៅថ្ងៃទី២៣ ខែកុម្ភៈ ឆ្នាំ២០១៧។ RFA/Rann Samnang |
អ្នកស្រី ទេព វន្នី ត្រូវបាននាំមកដល់បន្ទប់សវនាការនៅម៉ោងជាង ៨ព្រឹក។ ការបើកសវនាការជំនុំជម្រះជាថ្មីនេះ បន្ទាប់ពីចៅក្រមសាលាដំបូងរាជធានីភ្នំពេញ លោក ឡុង សេកភិរម្យ បានប្រកាសបិទអង្គជំនុំជម្រះភ្លាមៗ កាលពីរសៀលថ្ងៃទី៣ ខែកុម្ភៈ ដោយអះអាងថា លោកមានបញ្ហាសុខភាព ក្នុងពេលកំពុងដំណើរការជំនុំជម្រះ។
អាស៊ីសេរី RFA 2017-02-23
Aucun commentaire:
Enregistrer un commentaire