ដោយ ម៉ៅ សុធានី RFA 2018-06-03
ពលរដ្ឋនៅក្បែរតំបន់ព្រៃឡង់ក្នុងឃុំបឹងចារ ស្រុកសំបូរ ខេត្តក្រចេះ
អះអាងថា ដើមឈើផលិតជ័រទឹករាប់ពាន់ដើម ត្រូវគេកាប់រំលំ
ធ្វើអាជីវកម្មជាប្រព័ន្ធជាថ្មីទៀត និងមានពលរដ្ឋមួយចំនួន
លក់ដើមច្បោះឲ្យឈ្មួញ។
សហគមន៍ព្រៃឡង់ខេត្តក្រចេះត្អូញត្អែរថា
ពួកគេខ្លាចញញើតក្នុងការចុះល្បាតព្រៃ ដោយបារម្ភពីអាជ្ញាធរចោទថា
ជាក្រុមបក្សប្រឆាំង និងបដិវត្តន៍ពណ៌ នៅមុនពេលបោះឆ្នោតជាតិ។
ដើមឈើផលិតជ័រទឹករាប់ពាន់ដើម ឋិតនៅក្នុងដែនជម្រកសត្វព្រៃឡង់
ខេត្តក្រចេះ កំពុងទទួលរងការកាប់យកលើលក់
ទ្រង់ទ្រាយធំនៅរយៈពេលប៉ុន្មានសប្ដាហ៍ចុងក្រោយនេះ។ អ្នកភូមិថា
ក្រុមជនល្មើសបានបង្វែរកាប់ដើមឈើផលិតជ័រទឹកលក់គគ្រឹកគគ្រេង
ព្រោះដើមឈើធំៗ ដូចជា គគីរ ផ្ចឹក និងសុក្រំជាដើម
ត្រូវគេកាប់លក់អស់ទាំងស្រុង ហើយបច្ចុប្បន្ននៅសល់តែដើមឈើទាល និង
ត្រាច ដែលជាប្រភេទឈើដុតយកជ័រទឹក។
ពលរដ្ឋរស់នៅឃុំបឹងចារ ស្រុកសំបូរ ខេត្តក្រចេះ ថ្លែងមិនបញ្ចេញឈ្មោះ
ឲ្យដឹងនៅថ្ងៃទី៣ ខែមិថុនា ថា
ដើមឈើផលិតជ័រទឹកកំពុងត្រូវប៉ាន់លើទីផ្សារ
និងមានឈ្មួញខ្លះមានងារជាយោធា ចាំទទួលទិញ នៅមូលដ្ឋាន។
រីឯសមត្ថកិច្ច មន្ត្រីនគរបាលយុត្តិធម៌
និងឆ្មាំអភិរក្សរបស់ក្រសួងបរិស្ថានដែលប្រចាំការនៅតំបន់នោះ
គ្មានឆន្ទៈការពារព្រៃឈើនោះទេ។ លោកថា ការសម្របសម្រួលជាប្រាក់
និងធ្វើកិច្ចសន្យាបញ្ឈប់ រួចប្រគល់វត្ថុតាងឲ្យជនល្មើសវិញ
គឺជាយន្តការដោះស្រាយរបស់មន្ត្រីបរិស្ថាននៅតំបន់នោះ
រីឯជនល្មើសនៅតែមានឱកាសកាប់ឈើដដែលៗ។ លោកថា អ្នកភូមិខ្លះ
បានបង្ខំចិត្តលក់ដើមច្បោះរបស់ខ្លួន ឲ្យឈ្មួញរាប់រយដើម
ក្នុងមួយដើមតម្លៃចាប់ពី ២ម៉ឺនរៀល ដល់ ៣ម៉ឺនរៀល៖ «ច្រើនណាស់
បើសហគមន៍ចាប់បានហើយលែងវិញ យកម្នាក់១លាន និង ២លានអីចឹងទៅ
ទៅវិញទៅ ហើយ ឈ្មោះដដែលៗទៅអារឈើដដែលៗទៀត។
សម្រុកលក់ដើមច្បោះតាមគ្នាហើយឈ្មួញឥឡូវកំពុងត្រូវប៉ាន់
ព្រោះមានមេទាហានទិញដើមច្បោះហ្នឹង»។
បុរសដដែលបន្ថែមថា កាលពីពេលថ្មីៗនេះ
អ្នកភូមិបានទៅដល់ទីតាំងជនល្មើសកាប់ឈើផលិតជ័រទឹក នៅចំណុច អូរជះ
អូរទន្សោង អូរជាំ និង អូរស្ម ប្រទះឃើញដើមច្បោះរាប់រយដើម
ត្រូវគេអាររំលំ និងមានដើមច្បោះខ្លះទៀត
ត្រូវគេអារច្រៀកឈើជាគំនរធំៗ។ លោកថា អ្នកភូមិ ១០គ្រួសារ
បានថតយករូបភាពទុកជាភស្តុតាង ពីបទល្មើសព្រៃឈើទាំងនេះ
រួចប្ដឹងទៅអាជ្ញាធរឃុំ ឆ្មាំអភិរក្ស និងសមត្ថកិច្ចនៅតំបន់នោះ
ឲ្យចាប់ជនល្មើសអនុវត្តច្បាប់ តែគ្មានលទ្ធផលឡើយ៖ «បង្កើតសហគមន៍
និងបង្កើតបរិស្ថាន ពួកហ្នឹងស៊ីតែប្រាក់ខែ បើព្រៃដួលរាលថ្ងៃ
កាប់រាល់ថ្ងៃ ហើយឆ្លើយថាអត់ដឹង។ លួចកាប់របស់ប្រជាជន
លួចកាប់គររាប់ពាន់ដើម»។
ក្រុមស្នូលព្រៃឡង់ ខេត្តក្រចេះ
ថ្លែងក្នុងលក្ខខណ្ឌមិនបញ្ចេញឈ្មោះឲ្យដឹងថា សហគមន៍ព្រៃឡង់
មិនហ៊ានចេញមុខចុះល្បាតដូចមុនទេ
ព្រោះធ្លាប់ត្រូវបានអាជ្ញាធរគំរាមចាប់ដាក់គុក និងចោទពួកគេថា
ជាក្រុមបដិវត្តន៍ប្រឆាំងរបប លោក ហ៊ុន សែន។ លោកថា
កិច្ចសហការបង្ក្រាបបទល្មើសព្រៃឈើ រវាងសហគមន៍ និងមន្ត្រីជំនាញ
នៅរអាក់រអួលនៅឡើយ ព្រោះជនល្មើសតែងមានបណ្ដាញដឹងមុន៖
«ឥឡូវមិនទាន់ធ្វើអីទ្រង់ទ្រាយធំ ព្រោះកៀកបោះឆ្នោត
អាជ្ញាធរមូលដ្ឋានស្រឡាញ់សន្លឹកឆ្នោតជាង ស្រឡាញ់ជាតិ។ មួយរយៈនេះ
គេបើកដៃឲ្យធ្វើ»។
ប្រធានមន្ទីរបរិស្ថាន ខេត្តក្រចេះ លោក ដួង ឆាយសាវុធ ធ្លាប់លើកឡើងថា
ពលរដ្ឋត្រូវផ្តល់ដំណឹងមកមន្ត្រីបរិស្ថានខេត្តក្រចេះឲ្យចុះទប់ស្កាត់បន្ទាន់
ប្រសិនបើមានការលួចកាប់ឈើក្នុងតំបន់ព្រៃការពារ។
មន្ត្រីកម្មវិធីពង្រឹងសិទ្ធិអំណាចសហគមន៍នៃសមាគម អាដហុក (Adhoc) លោក
ប៉ែន បុណ្ណារ៍ ចាត់ទុកការលក់ដើមច្បោះ ឲ្យឈ្មួញគឺជាវប្បធម៌អាក្រក់
និងជាទង្វើល្មើសច្បាប់ ព្រោះតែអ្នកភូមិ គ្មានទំនុកចិត្ត
លើប្រសិទ្ធភាពអភិរក្សព្រៃឈើ របស់មន្ត្រីជំនាញ និងនគរបាលយុត្តិធម៌។
លោកថា ឆ្មាំអភិរក្ស
និងមន្ត្រីនគរបាលយុត្តិធម៌ពាក់ព័ន្ធទទួលសំណូកពីបទល្មើសព្រៃឈើ
ត្រូវតែមានទោសឧក្រិដ្ឋ៖ «រហូតដល់ប៉ះពាល់ដល់អារម្មណ៍ពលរដ្ឋ។
ពលរដ្ឋអត់ទីពឹងទេហើយ បើមេរៗលើប្ដឹងហើយ ស្រែកហើយ
រដ្ឋមន្ត្រីមិនព្រមបើកភ្នែក នៅតែការពាររបាយការណ៍ភូតភររបស់ខ្លួន
យើងគិតថា ព្រៃឈើនឹងរលាយ ស្ដាប់គ្នាលែងបានហើយ
ម្នាក់ៗនៅតែប្រមូលសំណូកដាក់ក្នុងហោប៉ាវ»។
សហគមន៍ព្រៃឡង់បន្ថែមថា ដើមឈើផលិតជ័រទឹក
គឺជាប្រភេទឈើដែលអ្នកភូមិដុតយកជ័រទឹក
បម្រើជីវភាពពលរដ្ឋរស់នៅតំបន់ព្រៃឡង់រាប់ពាន់គ្រួសារ។ ពលរដ្ឋខ្លះ
បានខ្លីបុលពីធនាគារច្រើនលានរៀល ដែលរំពឹងលក់អនុផលព្រៃឈើ
ដើម្បីបង្វិលសងម្ចាស់បំណុលវិញ តែបើដើមឈើផលិតជ័រទឹក
ត្រូវបាត់បង់ហើយនោះ
នឹងបង្កឲ្យសេដ្ឋកិច្ចរបស់អ្នកភូមិធ្លាក់ចុះយ៉ាងគំហុក៕
Aucun commentaire:
Enregistrer un commentaire