 |
| បសំណាកលោកយាយស្រី ស្ថិតក្នុងសង្កាត់បាទី ក្រុងបាវិត ខេត្តស្វាយរៀង កាលពីថ្ងៃទី២ ខែកញ្ញា ឆ្នាំ២០១៧។ |
បូជនីយដ្ឋានលោកយាយស្រី ឬគេហៅទូទៅថា
ទួលបុរាណអាស្រមលោកយាយស្រី ដែលស្ថិតក្នុងសង្កាត់បាទី ក្រុងបាវិត
ខេត្តស្វាយរៀង បានក្លាយជាទីកន្លែង
សក្ការបូជាដ៏មុតមាំរបស់ជនជាតិវៀតណាម ជារៀងរាល់ថ្ងៃ
ជាពិសេសក្នុងពិធីបុណ្យប្រពៃណីចិន-វៀតណាម។ ពលរដ្ឋខ្មែរ
នៅតំបន់នោះ ស្នើឲ្យអាជ្ញាធរ ជួយពិនិត្យមើលករណីនេះ
ព្រោះពួកគេបារម្ភពីចេតនាមិនល្អរបស់ជនជាតិវៀតណាម។
បូជនីយដ្ឋានលោកយាយស្រី មានផ្ទៃដីទំហំជិត
១ហិកតារ ស្ថិតនៅភូមិប្រសប់លាក់ សង្កាត់បាទី
ដែលមានចម្ងាយប្រមាណ៧គីឡូម៉ែត្រ ពីក្រុងបាវិត ខេត្តស្វាយរៀង
និងមានចម្ងាយប្រមាណ៣គីឡូ ម៉ែត្រពីព្រំដែនកម្ពុជា-វៀតណាម។ ទីនោះល្បីតៗគ្នាថា ជាកន្លែងដ៏ស័ក្ដិសិទ្ធិមួយតាំងពីយូរលង់ ណាស់មកហើយ។
លោកតាអាចារ្យម្នាក់ឈ្មោះ ធាត់ ស៊ីថា
ដែលនៅប្រចាំការមើលខុសត្រូវលើទួលបុរាណនោះ រៀបរាប់ថា
ប្រជាជនជាច្រើនក្នុងនោះក៏មានជនជាតិវៀតណាមដែរ
តែងមានជំនឿលើទួលនេះដោយ សារពេលបន់ស្រន់សុំអ្វីមួយ
តែងសម្រេចដូចបំណង ហើយអ្នកឈឺថ្កាត់ ក៏បានជាវិញ
ចំណែកអ្នកបន់ស្រន់ឲ្យរកស៊ីមានបាន ក៏ទទួលជោគជ័យ។
នៅលើទួលបុរាណនោះ គឺមានអាស្រមធំមួយ
ទើបសាងសង់ក្នុងឆ្នាំ២០១០ ដោយទទួលបានប្រាក់
ឧបត្ថម្ភភាគច្រើនរបស់ជនជាតិវៀតណាម។ ក្នុងអាស្រមថ្មនោះ
មានដាក់តម្កល់រូបសំណាកជាច្រើន ដែលតំណាងឲ្យលោកយាយស្រី។
ថ្វីត្បិតតែលោកយាយស្រីត្រូវគេស្គាល់ថា
ជាមនុស្សពូកែសក្ដិសិទ្ធិរបស់ខ្មែរក្ដី ប៉ុន្តែបច្ចុប្បន្ននេះ
រូបសំណាករបស់គាត់ ត្រូវបានគេបំពាក់មកុដ និងគ្រងសំលៀកបំពាក់
ឬអាវផាយរបស់វៀតណាមទៅវិញ។ ក្រៅពីរូបសំណាកលោកយាយស្រី
ក៏មានរូបសំណាកជាច្រើនទៀតដែរ ដូចរូបសំណាកព្រះគោព្រះកែវ
និងខ្ទមអ្នកតាចិន អ្នកតាវៀតណាមជាច្រើនទៀត ដែលត្រូវអន្ទងហៅ
ឲ្យមកសណ្ឋិតនៅលើទីទួលនោះជុំគ្នា។
លោកតាអាចារ្យ ធាត់ ស៊ីថា មិនបានដឹងច្បាស់
ពីប្រវត្តិនៃបូជនីយដ្ឋានលោកយាយស្រីនេះទេ
ព្រោះជាទួលបុរាណដែលល្បីតគ្នាយូរមកហើយ ប៉ុន្តែលោកដឹងថា
ជនជាតិវៀតណាម មានជំនឿលើ លោកយាយស្រី ជាយូរណាស់មកហើយដែរ គ្រាន់តែថា
បច្ចុប្បន្ននេះៗ មានជនជាតិវៀតណាមកាន់តែ ច្រើនឡើងៗ។
លោកតាអាចារ្យរូបនេះ បន្តថា
ការបំពាក់អាវផាយឲ្យលោកយាយស្រីគឺជាសទ្ធាជ្រះ
ថ្លារបស់ជនជាតិវៀតណាម ហើយលោក ក៏គ្មានសិទ្ធិសម្រេចអ្វីនោះដែរ
ព្រោះថាស្ថានីយបុរាណទួលលោកយាយស្រី
មានការគ្រប់គ្រងដោយក្រសួងវប្បធម៌ និងវិចិត្រសិល្ប។
ពលរដ្ឋម្នាក់រស់នៅក្នុងភូមិប្រសប់លាក់ និយាយថា នៅពេលមានពិធីបុណ្យទាក់ទិននឹងប្រពៃណី ចិន-វៀតណាម
គឺមានប្រជាជនវៀតណាមជាច្រើនបានធ្វើដំណើរមកធ្វើពិធីសាសនា
និងបន់ស្រន់ នៅទួលយាយស្រីនោះ។ ពលរដ្ឋរូបនេះ បញ្ជាក់ថា
បើនៅថ្ងៃធម្មតាអាចមានចន្លោះពី៤ ទៅ ៥ម៉ូតូ
ហើយបើថ្ងៃបុណ្យវិញគឺឡើងដល់រាប់រយម៉ូតូតែម្ដង។
ប្រជាពលរដ្ឋផ្សេងទៀត យល់ថា
អាជ្ញាធរមិនគួរបណ្ដោយអោយជនជាតិវៀតណាមចេញចូល និង
ធ្វើអ្វីៗតាមតែអំពើចិត្ត ក្នុងទឹកដីខ្មែរនោះទេ
ជាពិសេសនៅទីកន្លែងគោរពសក្ការរបស់ខ្មែរ។ លោក បន្តថា
ពួកគេមានសិទ្ធិមកគោរពបូជា និងបន់ស្រន់បាន
តែមិនត្រូវមកកែច្នៃកន្លែងបុរាណរបស់ខ្មែរឲ្យ ទៅជារបស់ពួកគេឡើយ។
ពលរដ្ឋមួយចំនួនទៀត បារម្ភថា ទង្វើជនជាតិវៀតណាមនេះ គឺជាមធ្យោបាយពង្រីកទឹកដីរបស់វៀតណាម ក្រោមហេតុផលជំនឿសាសនា។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា
លោក សន ជ័យ មានប្រសាសន៍ថា
ការបណ្ដោយឲ្យជនជាតិបរទេសចូលមកធ្វើពិធីសាសនា
តាមអំពើចិត្តក្នុងប្រទេសកម្ពុជា
គឺបង្ហាញពីកម្សោយមួយរបស់អាជ្ញាធររដ្ឋាភិបាល។ លោកពន្យល់ថា
បញ្ហាប្រពៃណីទំនៀបទម្លាប់ និង សាសនា គឺជាធាតុផ្សំមួយតំណាងឲ្យជាតិ
ឬរដ្ឋមួយ ដូច្នេះប្រសិនមានជនបរទេសណាមួយដែល
មានគំនិតមិនល្អធ្វើឲ្យប៉ះពាល់ ឬធ្វើឲ្យបាត់បង់នូវធាតុដើម
ឬក៏យកអ្វីមួយមកផ្សព្វផ្សាយបញ្ជ្រាបចូលក្នុងប្រពៃណីទំនៀមទម្លាប់របស់កម្ពុជា
នឹងធ្វើឲ្យមានផលប៉ះពាល់រយៈពេលវែងសម្រាប់កម្ពុជា។
មួយរយៈចុងក្រោយនេះ ជនអន្តោប្រវេសន៍វៀតណាម
តែងតែចូលមកប្រើប្រាស់ទឹកដីរបស់កម្ពុជា
សម្រាប់ធ្វើជាទីតាំងគោរពបូជាតាមបែបសាសនា និងធ្វើសមាធិ
ដូចជានៅភ្នំបូកគោ ខេត្តកំពត និង នៅតំបន់អង្គរ ក្នុងខេត្តសៀមរាប
រួមទាំងស្ថានីយបុរាណទួលយាយលោកស្រីក្នុងខេត្តស្វាយរៀង ជាដើម។
ទង្វើនេះ ប្រជាពលរដ្ឋសង្ស័យថា ការយកទីតាំងបុរាណរបស់ខ្មែរ
ដើម្បីធ្វើពិធីសាសនា និងសក្ការបូជានេះ
អាចធ្វើឡើងក្រោមហេតុផលអ្វីមួយមិនល្អ។ ប្រជាពលរដ្ឋ
និងមន្ត្រីសង្គមស៊ីវិល អំពាវនាវឲ្យអាជ្ញាធរ
និងស្ថាប័នពាក់ព័ន្ធចុះពិនិត្យមើលសកម្មភាពរបស់ជនជាតិវៀតណាម ដែល
ចូលមកគោរព និងធ្វើការបន់ស្រន់នៅទីតាំងបូជនីយដ្ឋានលោកយាយស្រីនោះ៕
ដោយ អាស៊ីសេរី
2017-10-25
2017-10-25
យួនស្អីក៏លួចដែរ....
RépondreSupprimer