ភ្នំពេញៈ លោក ធន សារាយ បានហៅការចាប់ឃុំខ្លួនមន្ត្រីអង្គការសិទ្ធិមនុស្សអាដហុក ៤ រូប និងមន្ត្រី គជប មួយរូបថាធ្វើឡើងដោយ «បំពាន» និង «អយុត្តិធម៌បំផុត» ខណៈដែលជនជាប់ចោទបានហៅតុលាការថាជា «តុលាការតេឡេកុម៉្មង់» នៅពេលដែលសាលាដំបូងរាជធានីភ្នំពេញកាលពីម្សិលមិញបានសម្រេចពន្យារពេលបន្តឃុំខ្លួនមន្ត្រីទាំងនេះចំនួន ៦ ខែបន្តទៀតក្នុងសំណុំរឿងសូកប៉ាន់សាក្សី បន្ទាប់ពីបានឃុំខ្លួនពួកគាត់អស់រយៈពេលមួយឆ្នាំគត់គិតត្រឹមថ្ងៃនេះ។
មន្ត្រីអាដហុកដែលធ្លាប់បានជួយអន្តរាគមន៍ប្រជាពលរដ្ឋរងគ្រោះរឿងរំលោភសិទ្ធិមនុស្សរាប់ពាន់នាក់មកហើយនោះត្រូវបានតុលាការក្រុងភ្នំពេញចោទប្រកាន់ពីបទ «សមគំនិតក្នុងអំពើសូកប៉ាន់សាក្សី» ប្រព្រឹត្តកាលពីខែមីនាដល់ខែមេសា ឆ្នាំ ២០១៦។
មន្ត្រីទាំងបួនរូបរួមមានលោក នី សុខា លោក ណៃ វ៉ង់ដា លោក យី សុខសាន្ត និងលោកស្រី លឹម មុនី។ ចំណែកលោក នី ចរិយា មន្ត្រី គ.ជ.ប ក៏ជាប់ចោទក្នុងបទចោទដូចគ្នានេះដែរ។
លោកស្រី លឹម មុនី បានថ្លែងពេលចុះពីបន្ទប់ចៅក្រមស៊ើបសួរថា៖ «គាត់ (ចៅក្រម) បន្តឃុំខ្លួនយើងបន្តទៀត។ ខ្ញុំយល់ថាមូលហេតុដែលចៅក្រមសុំបន្តការឃុំខ្លួននេះជាមូលហេតុដែលមិនត្រឹមត្រូវដែលជាការរំលោភសិទ្ធិ»។
លោក យី សុខសាន្ត ថ្លែងថា៖ «ខ្ញុំយល់ថា ៦ ខែដែលឃុំខ្លួនខ្ញុំវាអត់មានអីប្លែកសោះ»។
លោក នី សុខា ក៏ថ្លែងយ៉ាងខ្លីដែរថា៖ «យើងគិតថាតុលាការយើងអត់អីចម្លែកទេ ពីព្រោះគាត់អត់ម្ចាស់ការខ្លួនឯងទេ។ រឿងនេះមិនមែនតុលាការទេព្រោះតុលាការមិនច្បាស់ការទេឥឡូវនេះ។ គាត់សម្រេចតាមគេហៅថា តេឡេកុម៉្មង់»។
មេធាវីការពារមន្ត្រីអាដហុកទាំងបួនគឺលោក ឡោ ជុនធី ថ្លែងថានេះជាការពន្យារចុងក្រោយហើយ «នៅក្នុងដំណាក់កាលនេះនឹងមានដីកាសម្រេចមួយគឺដីកាដំណោះស្រាយថាតើត្រូវលើកលែងចោទប្រកាន់ ឬត្រូវបញ្ជូនពួកគាត់ទៅជំនុំជម្រះក្នុងរយៈពេល ៦ ខែនេះ»។
លោកបញ្ជាក់ថា ការបន្តឃុំខ្លួននេះមិនសមហេតុផលទេដោយលោកថ្លែងថា «កាលពី ៦ ខែមុនការស៊ើបអង្កេតនៅមានតិចតួច មិនសូវមានសកម្មភាពស៊ើបអង្កេតអីទេ។ បើស៊ើបអង្កេតបន្តអ្វីដែលយើងចង់បានគឺធ្វើម៉េចឲ្យបានលឿនបំផុត ...»។
ដូចគ្នានេះដែរលោក សំ សុគង់ មេធាវីការពារលោក នី ចរិយា ថ្លែងថាគ្មានលក្ខខណ្ឌចាំបាច់ណាដែលត្រូវបន្តការពន្យារពេលការឃុំខ្លួនទេដោយសារវាប៉ះពាល់ដល់សិទ្ធិរបស់កូនក្តីដែលច្បាប់តម្រូវឲ្យមានការជំនំជម្រះឲ្យបានឆាប់។ «បើយើងមើលបទល្មើសទាក់ទងនឹងលោក នី ចរិយា មិនមានភាពស្មុគស្មាញទេគឺអត់មានអីពាក់ព័ន្ធសោះ។ អ៊ីចឹងការស៊ើបសួររយៈពេល ១២ ខែនេះគ្រប់គ្រាន់ហើយ»។
កាលពីម្សិលមិញលោក ធន សារាយ ប្រធានសមាគមអាដហុកដែលកំពុងភៀសខ្លួននៅក្រៅប្រទេសបានហៅការឃុំខ្លួននេះថា «ជារឿងអយុត្តិធម៌បំផុត»។
នៅក្នុងឃ្លីបវីដេអូដែលបង្ហោះតាមហ្វេសប៊ុកអង្គការអាដហុកលោក សារាយ បានសង្ខេបសាច់រឿងដែលឈានដល់ការចាប់ខ្លួនមន្ត្រីរបស់លោកថា កញ្ញា ខុម ចាន់ដារ៉ាទី ហៅ ស្រីមុំ បានទៅពឹងពាក់អង្គការអាដហុកឲ្យជួយការពារផ្នែកច្បាប់ដោយនាងអះអាងថានាងមានការភ័យខ្លាច និងថាមិនមានទំនាក់ទំនងផ្លូវភេទអ្វីជាមួយលោក កឹម សុខា ប្រធានគណបក្សសង្គ្រោះជាតិទេ។ ដោយសារតែនាងមានការខ្វះខាតក្រោយមានបញ្ហាកើតឡើង នាងបានស្នើសុំជំនួយហិរញ្ញវត្ថុពីអង្គការដោយមានលិខិតត្រឹមត្រូវ។
សមាគមអាដហុកក៏បានសម្រេចផ្តល់ជំនួយថវិកា ២០៤ ដុល្លារដោយមានឯកសារទទួលត្រឹមត្រូវ។
លោកបញ្ជាក់ថា៖ «ពេលទៅដល់តុលាការនាង ស្រីមុំ នេះបានប្តូរចម្លើយថានាងធ្លាប់មានទំនាក់ទំនងផ្លូវភេទជាមួយលោក កឹម សុខា ទៅវិញ។ នាងនេះក៏បានចេញលិខិតចំហមួយដោយបានចោទប្រកាន់ថាបុគ្គលិកសមាគមបានបញ្ចុះបញ្ចូលនាងថាមិនឲ្យនិយាយពីទំនាក់ទំនងផ្លូវភេទនេះទៅវិញ»។
លោកបន្តថាថវិកា ២០៤ ដុល្លារដែលផ្តល់ឲ្យទៅ ស្រីមុំ គឺជាថវិកាសមាគមសម្រាប់ជួយជនរងគ្រោះទូទៅតាមការស្នើសុំដែលវាមិនមែនជាអំពើពុករលួយទេ ហើយបើសិនជារឿងពុករលួយ ត្រូវចាប់ទាំងអ្នកសូក និងអ្នកស៊ី។
លោកក៏បញ្ជាក់ដែរថា មានទំនាក់ទំនងផ្លូវភេទ ឬគ្មាន មិនមែនជាបទល្មើសព្រហ្មទណ្ឌទេ។
លោក សារាយ ថ្លែងទៀតថា៖ «ការបន្តឃុំខ្លួនពួកគាត់ទាំងបំពានដូច្នេះ ធ្វើឲ្យប៉ះពាល់យ៉ាងធ្ងន់ធ្ងរដល់សិទ្ធិ និងផ្លូវចិត្តអ្នកជាប់ឃុំ និងសាច់ញាតិរបស់ពួកគាត់។ លើសពីនេះកិត្តិយសរបស់រដ្ឋាភិបាលនឹងបាត់បង់កាន់តែខ្លាំងពីកែវភ្នែកអន្តរជាតិ»។
លោក សារាយ បានអំពាវនាវដល់រដ្ឋាភិបាលឲ្យទម្លាក់ការចោទប្រកាន់លើពួកគាត់ទាំង ៥ នាក់ និងដោះលែងពួកគាត់ជាបន្ទាន់៕
Fri, 28 April 2017
Aucun commentaire:
Enregistrer un commentaire