ប្រជាពលរដ្ឋនៅឃុំបឹងល្វា ស្រុកសន្ទុក ខេត្តកំពង់ធំ លើកឡើងថា មានមន្ត្រីអាជ្ញាធរមូលដ្ឋាន និងមន្ត្រីទាហាន ឃុបឃិតគ្នាយកប្រាក់ថ្លៃធ្វើដំណើរលើផ្លូវសាធារណៈក្នុងឃុំ ក្រោមហេតុផលថាពួកគេបានធ្វើ និងជួសជុលផ្លូវនោះ។ ពលរដ្ឋយល់ថា ការយកប្រាក់នេះ គឺធ្វើឲ្យប៉ះពាល់ដល់ជីវភាពប្រចាំថ្ងៃរបស់ពួកគាត់។ បញ្ហានេះ អភិបាលស្រុកសន្ទុក បញ្ជាក់ថា នឹងចាត់វិធានការដោះស្រាយបញ្ចប់វិវាទមួយនេះ។
ប្រជាពលរដ្ឋនៅឃុំបឹងល្វា ស្នើឲ្យអាជ្ញាធរជួយអន្តរាគមន៍បញ្ឈប់សកម្មភាពយកប្រាក់ពីប្រជាពលរដ្ឋថ្លៃឆ្លងកាត់ផ្លូវ និងស្ពានមួយកន្លែងនៅក្នុងឃុំ។ ពួកគេលើកឡើងថា ប្រសិនបើអាជ្ញាធរនៅតែបណ្ដោយឲ្យក្រុមឈ្មួញដែលជាមន្ត្រីទាហានស្រុកសន្ទុក បន្តយកប្រាក់ពីប្រជាពលរដ្ឋទៀតនោះ ពួកគាត់នឹងនាំគ្នាឡើងមកតវ៉ាដល់ថ្នាក់ខេត្តតែម្តង។
ប្រជាពលរដ្ឋនៅឃុំបឹងល្វា លោក ដុក វី ឲ្យដឹងថា សកម្មភាពយកប្រាក់ពីប្រជាពលរដ្ឋដែលឆ្លងកាត់ផ្លូវមួយខ្សែនៅឃុំបឹងល្វា គឺកើតឡើងជាង ១ឆ្នាំមកហើយ។ លោកបន្តថា មានមន្ត្រីទាហាននៅស្រុកសន្ទុក ម្នាក់ បានបោះទីតាំងយកប្រាក់ពីពលរដ្ឋដោយក្នុងរថយន្តមួយគ្រឿង ១ម៉ឺនរៀល រទេះគោក្របីឆ្លងកាត់ទៅមក ១ម៉ឺនរៀល ម៉ូតូ ១គ្រឿង ១ពាន់រៀលក្នុងពេលធ្វើដំណើរឆ្លងកាត់ម្តង៖ «សុំឲ្យគាត់ហ្នឹងឈប់ទៅ ហើយសុំឲ្យរដ្ឋាភិបាល (សង់) ស្ពានហ្នឹងឲ្យមួយមក ចម្ងាយប្រហែល ៤ម៉ែត្រទេ»។
ក្រុមប្រជាពលរដ្ឋលើកឡើងថា ដំបូងឡើយ ផ្លូវប្រមាណ ៣គីឡូម៉ែត្រក្នុងភូមិកោះដង្កូវ និងស្ពានឆ្លងកាត់មួយកន្លែងនៅចំណុចអូរកែងទាត់ ឃុំបឹងល្វា គឺពលរដ្ឋបានរៃអង្គាសប្រាក់គ្នាក្នុងមួយគ្រួសារ ១០ម៉ឺនរៀល ឬតិចជាងហ្នឹង ដើម្បីកសាងកាលពីឆ្នាំ២០១៥។ ក្រោយមកក៏មានទាហាននៅស្រុកសន្ទុក ម្នាក់ តម្រូវឲ្យពលរដ្ឋបង់ប្រាក់រាល់ពេលឆ្លងកាត់ ក្រោមហេតុផលថា ប្រាក់ដែលប្រជាពលរដ្ឋរៃអង្គាសគ្នាកាលនោះ គឺមិនគ្រប់ចំនួនថ្លៃកសាង ហើយរូបគេបានចេញថ្លៃធ្វើផ្លូវ និងស្ពាននោះចំនួនជិត ២០លានរៀលបន្ថែមទៀត។
ជាថ្នូរនឹងការចេញប្រាក់ជំនួសពលរដ្ឋចំពោះថ្លៃកសាងផ្លូវ និងស្ពានមួយចំណែកកាលណោះ ទាហានម្នាក់នៅស្រុកសន្ទុក ក៏បានស្នើឲ្យពលរដ្ឋបង់ប្រាក់ថ្លៃធ្វើដំណើររយៈពេល ៦ខែ ចាប់ពីខែកុម្ភៈ ដល់ត្រឹមខែសីហា ឆ្នាំ២០១៥ ប៉ុន្តែអ្នកភូមិអះអាងថា ទាហានរូបនោះមិនបានបញ្ឈប់ការយកប្រាក់ត្រឹមពេលកំណត់ឡើយ បែរជាយករហូតដល់បច្ចុប្បន្ន។
ពលរដ្ឋម្នាក់ទៀតសុំមិនបញ្ចេញឈ្មោះ និយាយថា ពួកគាត់បានដាក់ពាក្យប្ដឹងទៅអាជ្ញាធរមូលដ្ឋានជាច្រើនលើកច្រើនសា ប៉ុន្តែអាជ្ញាធរបានត្រឹមរុញការទទួលខុសត្រូវដាក់គ្នាទៅវិញទៅមកប៉ុណ្ណោះ។ ពលរដ្ឋដដែលចោទប្រកាន់អាជ្ញាធរទាំងនោះថា បានឃុបឃិតគ្នាដើម្បីធ្វើអាជីវកម្មលើខ្នងប្រជាពលរដ្ឋតែម្តង ហើយអាចទទួលបានផលប្រយោជន៍ពីទាហានដែលបានដាក់កុងត្រូលសម្រាប់យកប្រាក់ពីអ្នកភូមិទៀតផង៖ «ស្នើសុំឲ្យរាជរដ្ឋាភិបាលខាងស្រុក ខាងខេត្តហ្នឹង ជួយយកភ្នែកមើលផង ព្រោះគាត់ធ្វើអ៊ីចឹងធ្លាក់អស់ហើយសន្លឹកឆ្នោត»។
ឆ្លើយតបបញ្ហានេះ អភិបាលស្រុកសន្ទុក លោក យស់ បញ្ញារិទ្ធិ មានប្រសាសន៍នៅថ្ងៃទី១៧ កក្កដា ថា ខាងលោកនៅមិនទាន់ទទួលបានពាក្យបណ្ដឹងពីពលរដ្ឋជាផ្លូវការទេ ប៉ុន្តែលោកបានចាត់ឲ្យអាជ្ញាធរឃុំសម្របសម្រួលលើបញ្ហានេះ។ លោកថាបានបញ្ជាឲ្យបញ្ឈប់ការយកប្រាក់ពីប្រជាពលរដ្ឋដែលធ្វើដំណើរលើផ្លូវ និងស្ពានមួយកន្លែងនោះ ពីព្រោះសកម្មភាពយកប្រាក់កន្លងមក អាជ្ញាធរមិនបានទទួលស្គាល់តាមផ្លូវច្បាប់ឡើយ៖ «ក្រោយពីបានព័ត៌មានហ្នឹង ខ្ញុំបានបញ្ចប់ បានបញ្ឈប់ ហើយខ្ញុំឲ្យមេឃុំសម្របសម្រួលជាមួយសហគមន៍ធ្វើការបន្តទៅ»។
អភិបាលស្រុកដដែលបដិសេធថា អាជ្ញាធរមិនដែលទទួលប្រាក់ពីម្ចាស់អាជីវកម្ម ឬអ្នកដាក់កុងត្រូលយកប្រាក់ពីពលរដ្ឋទេ។ លោកថា តំបន់ពលរដ្ឋរស់នៅនោះ កន្លងមកជាតំបន់អនាធិបតេយ្យ ដោយមិនទាន់ទទួលស្គាល់ជាផ្លូវការតាមផ្លូវច្បាប់។ តែយ៉ាងណា ក្រោយពេលភូមិមួយចំនួននៅឃុំបឹងល្វា ត្រូវបានក្រសួងមហាផ្ទៃ ទទួលស្គាល់តាមច្បាប់ហើយនោះ អាជ្ញាធរនឹងកសាងហេដ្ឋារចនាសម្ព័ន្ធ រួមមានផ្លូវ ស្ពាន ជូនប្រជាពលរដ្ឋ។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ មើលឃើញថា ករណីយកប្រាក់ថ្លៃធ្វើដំណើរពីពលរដ្ឋនេះ គឺមិនស្របតាមផ្លូវច្បាប់ឡើយ ពីព្រោះមិនមានកិច្ចសន្យារវាងអាជ្ញាធររាជរដ្ឋាភិបាល និងម្ចាស់អាជីវកម្ម ព្រមទាំងមិនមានតម្លាភាពផង។ លោកបន្តថា អាជ្ញាធរអាចដក ឬបញ្ឈប់ម្ចាស់អាជីវកម្មនោះបាន ដោយមិនចាំបាច់មានសំណង ពីព្រោះការយកប្រាក់ពីពលរដ្ឋកន្លងមក គឺជាសកម្មភាពខុសច្បាប់៕
ដោយ សូត សុខប្រាថ្នា
RFA 2016-07-17
RFA 2016-07-17
Aucun commentaire:
Enregistrer un commentaire