កំពង់ចាមៈ សកម្មជនគណបក្សសង្គ្រោះជាតិ ៣ រូបត្រូវបានសមត្ថកិច្ចខេត្តកំពង់ចាមបញ្ឈប់សកម្មភាពដឹករូបថតសពលោក កែម ឡី តាមរ៉ឺម៉កក្រោមហេតុផលថានាំឲ្យប៉ះពាល់ចរាចរណ៍ដោយសារមានអ្នករោមចូលបច្ច័យកាលម្សិលមិញនៅម្តុំផ្សារបឹងកុក ភូមិបឹងកុក សង្កាត់បឹងកុក ក្រុងកំពង់ចាម។ នេះបើតាមស្នងការនគរបាលខេត្ត។
តាមមន្ត្រីសង្គ្រោះជាតិរ៉ឺម៉កដឹករូបថតនេះគ្មានបំណងអង្គាសបច្ច័យទេគឺដឹកតម្រង់ទៅស្នាក់ការបក្សដើម្បីគោរពតែជាសន្ដានចិត្តពលរដ្ឋពួកគាត់ចូលបុណ្យតាមផ្លូវដោយគេយល់ថាលោក កែម ឡី ជាអ្នកវិភាគឯករាជ្យល្បីមួយរូបជាមនុស្សគួរឲ្យគោរពហើយត្រូវខ្មាន់កាំភ្លើងបាញ់ឲ្យស្លាប់នៅកណ្តាលរាជធានី។
លោក បែន រ័ត្ន ស្នងការនគរបាល ខេត្តកំពង់ចាមឲ្យដឹងពីម្សិលមិញថាមនុស្ស ៣ នាក់មានស្រីម្នាក់ ប្រុសពីរនាក់របស់គណបក្សសង្គ្រោះជាតិត្រូវបានលោកបញ្ជាឲ្យនគរបាលប៉ុស្តិ៍បឹងកុក «ហៅមកសួរនាំដោយមិនមានការឃាត់ខ្លួននោះទេ» បន្ទាប់ពីពួកគេដឹករូបថតកាត់ផ្សារបឹងកុកមានដាក់ទៀន ធូប ផ្កា ដើម្បីឲ្យពលរដ្ឋចូលបច្ច័យ។
លោកថា៖ «ខ្ញុំជម្រាបគាត់ថាខ្ញុំមិនអនុញ្ញាតឲ្យធ្វើអ៊ីចឹងទេតែជម្រើសមានពីរគឺទី ១ គាត់ទៅសុំច្បាប់ក្រុងសិនទៅហើយ ទី ២ បើសុំច្បាប់ហើយគាត់ទៅធ្វើនៅផ្ទះនៅស្នាក់ការក៏បានបើធ្វើលើផ្លូវគឺត្រូវសុំច្បាប់។ ដូចពលរដ្ឋហែជំនូនការអីក៏ត្រូវសុំច្បាប់អាជ្ញាធរដែរ»។
លោកបន្តថា៖ «វាប៉ះពាល់សណ្តាប់ធ្នាប់មុខផ្សារ។ តែយើងបានហៅគាត់សួរហើយឲ្យផ្តិតមេដៃឲ្យទៅវិញគ្រាន់តែសួរមួយម៉ោងកន្លះទេ»។
យ៉ាងណាក៏ដោយរូបថតក៏នៅត្រូវបានដឹកទៅទីស្នាក់ការបក្សបន្តទៀតដើម្បីប្រារព្ធពិធី។
លោក ម៉ៅ មុន្នីវណ្ណ តំណាងរាស្ត្រមណ្ឌលកំពង់ចាមថ្លែងថាក្រុមការងារបក្សគ្មានបំណងដឹករូបលោក កែម ឡី ដើម្បីរៃអង្គាសបច្ច័យទេគឺពួកគេដឹកពីកន្លែងតុបតែងមកស្នាក់ការបក្សដើម្បីគោរពបូជាប៉ុន្តែត្រូវសមត្ថកិច្ចឃាត់។
លោកថ្លែងថា៖ «ពេលដឹកក៏មានអ្នកចូលបុណ្យតាមហ្នឹងទៅនោះជាការពិតមិនអាចបិទសិទ្ធិពលរដ្ឋបានទេយើងមិនមានហៅពលរដ្ឋឲ្យចូលបុណ្យទេ»។
ទោះបីយ៉ាងណា លោកថា ពលរដ្ឋអាចចូលបច្ច័យតាមសទ្ធានៅស្នាក់ការបក្សជាកន្លែងត្រូវដាក់តាំងរូបថតសពឲ្យគោរពហើយបច្ច័យនឹងត្រូវយកទៅដល់គ្រួសារសពដែលកំពុងប្រារព្ធពិធីបុណ្យនៅវត្តចាស់ ភ្នំពេញ៕
Wed, 13 July 2016
Aucun commentaire:
Enregistrer un commentaire