អ្នកនាំពាក្យគណបក្សប្រជាជនកម្ពុជា បានប្រតិកម្មភ្លាមៗជុំវិញបញ្ហានេះ ស្នើទៅអង្គការសហប្រជាជាតិកុំឲ្យខ្វាយខ្វល់ពីបញ្ហារបស់កម្ពុជា ហើយគួរយកពេលនេះវេលានេះ ទៅដោះស្រាយបញ្ហារបស់ប្រទេសដែលកំពុងមានសង្គ្រាមល្អជាង។
អ្នកនាំពាក្យគណបក្សប្រជាជនកម្ពុជា សុខ ឥសាន សរសេរនៅលើបណ្ដាញទំនាក់ទំនងសង្គមតេឡេក្រាម (Telegram) ថ្ងៃទី២៤ ខែធ្នូថា អង្គការសហប្រជាជាតិក្ដី សហគមន៍អន្តរជាតិក្តី និងអង្គការនានា គួរទុកពេលទៅមើលនិងជួយដោះស្រាយបញ្ហានៅបណ្ឌាប្រទេសមួយចំនួននៅមជ្ឈិមបូព៌ា នៅអាហ្វ្រិក និងនៅតំបន់មួយចំនួនទៀត ដែលកំពុងហុយផ្សែងវិញ វាប្រសើរជាង មកគិតគូរពីបញ្ហាផ្ទៃក្នុងកម្ពុជា ដែលកំពុងមានសុខសន្តិភាព និងការអភិវឌ្ឍនោះ។ សុខ ឥសាន នៅតែនិយាយដដែលថា ករណីចាប់ខ្លួនលោក កឹម សុខា គឺជារឿងផ្ទៃក្នុងរបស់កម្ពុជា ស្ថិតនៅក្នុងក្របខ័ណ្ឌនៃដែនឯករាជ្យ និងអធិបតេយ្យភាពរបស់កម្ពុជា គ្មានបរទេស ឬប្រទេសណាអាចមកលូកដៃបានជាដាច់ខាត។
អ្នកវិភាគនយោបាយ ឡៅ ម៉ុងហៃ និយាយថា ផ្អែកតាមកិច្ចព្រមព្រៀងសន្តិភាពទីក្រុងប៉ារីស និងកិច្ចព្រមព្រៀងរបស់អង្គការសហប្រជាជាតិ និងប្រទេសកម្ពុជាដែលកម្ពុជាជាសមាជិករបស់អង្គការសហប្រជាជាតិ គឺអង្គការសហប្រជាជាតិមានសិទ្ធិពេញលេញក្នុងការតាមដានស្រាវជ្រាវពីការគោរពសិទ្ធិមនុស្ស ប្រជាធិបតេយ្យនៅកម្ពុជាពេលនេះ។ លោកបន្តថា ទោះចង់ ឬមិនចង់ វិបត្តិនយោបាយនៅកម្ពុជានៅពេលនេះ រដ្ឋាភិបាលកំពុងរងការចោទប្រកាន់ថា រំលោភសិទ្ធិមនុស្សធ្ងន់ធ្ងរ ដូចការដែលអង្គការសហប្រជាជាតិយកបញ្ហារបស់កម្ពុជាមកពិនិត្យមើល គឺជាអ្វីដែលអង្គការសហប្រជាជាតិត្រូវធ្វើ។ «»
កាលពេលថ្មីៗនេះ កញ្ញា កឹម មនោវិទ្យា បានចូលរួមជជែកពិភាក្សាក្នុងវេទិកានៅស្ថានបេសកកម្មអចិន្ត្រៃយ៍របស់សហរដ្ឋអាមេរិកប្រចាំនៅអង្គការសហប្រជាជាតិ ដែលនិយាយអំពីបញ្ហាធ្លាក់ចុះនៃលទ្ធិប្រជាធិបតេយ្យនៅកម្ពុជា ក្នុងទីក្រុងញូវយ៉ក។
សុខ ឥសាន បាននិយាយចំអកថា មហិច្ឆតា កញ្ញា កឹម មនោវិទ្យា ដែលសុំអន្តរាគមន៍ពីអង្គការសហប្រជាជាតិឲ្យដាក់ទណ្ឌកម្មលើរដ្ឋាភិបាលនោះនឹងត្រូវបរាជ័យ។ ប៉ុន្តែ កញ្ញា កឹម មនោវិទ្យា ឆ្លើយតបខ្លាំងៗវិញថា សុខ ឥសាន ខ្វះខាតចំណេះដឹងខាងកិច្ចការបរទេស និងដំណើរការរបស់អង្គការសហប្រជាជាតិ៕
2017-12-24
Aucun commentaire:
Enregistrer un commentaire