ក្រុងហាណូយៈ ថា្នក់ដឹកនាំកុម្មុយនីស្តចិន និងវៀតណាមបានឈានដល់ដំណោះស្រាយនៃជម្លោះសមុទ្រចិនខាងត្បូង ដែលសារព័ត៌មានរដ្ឋចិនបានរាយការណ៍កាលពីថ្ងៃអាទិត្យ បន្ទាប់ពីប្រធានាធិបតីអាមេរិកលោកដូណាល់ ត្រាំ បានស្ម័គ្រចិត្ត ជួយសម្រុះសម្រួលក្នុងជម្លោះនោះ។
ប្រធានាធិបតីចិន លោកស៊ីជីនភីង បានជួបអគ្គលេខាធិការបក្សកុម្មុយនីស្ត វៀតណាមលោក Nguyen Phu Trong អំឡុងទស្សនកិច្ចផ្លូវរដ្ឋនៅទីក្រុងហាណូយកាលពីថ្ងៃអាទិត្យ បន្ទាប់ពីលោកត្រាំ បានធ្វើទស្សនកិច្ចទៅកាន់ប្រទេសនេះ ដែរនោះ។
ភ្នាក់ងារព័ត៌មាន Xinhua បានរាយការណ៍ថា ភាគីចិន និងវៀតណាម បានព្រមព្រៀងជាមួយគ្នាដោយផ្អែកទៅលើថ្នាក់ដឹកនាំបក្ស និងថ្នាក់ដឹកនាំប្រទេស នៃប្រទេសទាំងពីរ ដែលការព្រមព្រៀងនេះអាចជួយឲ្យពួកគេក្នុងការគ្រប់គ្រងបញ្ហាសមុទ្របានល្អ ជួយឲ្យមានការរីកចម្រើននៃកិច្ចសហប្រតិបត្តិការផ្លូវសមុទ្រដែលរួមមានការអភិវឌ្ឍរួមគ្នា និងអាចជួយឲ្យប្រទេសទាំង ២ អាចថែរក្សាស្ថិរភាព និងសន្តិភាពនៅសមុទ្រចិនខាងត្បូង។
សេចក្ដីរាយការណ៍នោះ មិនបានផ្ដល់ព័ត៌មានលម្អិត អំពីកិច្ចព្រមព្រៀងនោះទេ។
ប្រទេសចិន បានទាមទារស្ទើរតែទាំងអស់នូវផ្ទៃសមុទ្រសំខាន់ ដែលមានសកម្មភាពដឹកជញ្ជូនទំនិញឆ្លងកាត់ក្នុងតម្លៃប្រមាណជា ៥ ពាន់លានដុល្លារអាមេរិកក្នុងមួយឆ្នាំៗ ហើយវាត្រូវបានគេជឿដែរថា នៅក្រោមផ្ទៃទឹកសមុទ្រនោះ ក៏មានធនធានធម្មជាតិដ៏ច្រើនសម្បើម ដូចជាប្រេង និងឧស្ម័នធម្មជាតិ។
វៀតណាម ហ្វីលីពីន ម៉ាឡេស៊ី ប្រ៊ុយណេ និងតៃវ៉ាន់ ក៏មានការទាមទារនៅក្នុងសមុទ្រនោះដែរ ហើយជម្លោះមួយនេះ ត្រូវបានគេប្រមើលមើលថា គឺជាមូលហេតុសក្ដានុពលក្នុងការបង្កជម្លោះនៅទី្វបអាស៊ី។
ប៉ុន្មានថ្ងៃបន្ទាប់ពីត្រាំ បានជួបលោកស៊ី នៅក្រុងប៉េកាំង លោកក៏បានជួបលោក TranDaiQuang នៅក្រុងហាណូយដែរ៕
Xinhua
Tue, 14 November 2017
Aucun commentaire:
Enregistrer un commentaire