ម្ដាយរបស់បណ្ឌិត កែម ឡី ដែលកំពុងរស់នៅខេត្តតាកែវ មិនចង់ឃើញសំណុំរឿងឃាតកម្មលើកូនប្រុសរបស់គាត់ត្រូវបិទបញ្ចប់ត្រឹមការកាត់ទោសបុគ្គលឈ្មោះ អឿត អាង ហៅ ជួប សម្លាប់ នោះទេ។ លោកស្រីចង់ឱ្យមានការស៊ើបអង្កេតរកអ្នកពាក់ព័ន្ធមកកាត់ទោសជាបន្តបន្ទាប់ទៀត ដើម្បីផ្តល់យុត្តិធម៌ពិតប្រាកដដល់ក្រុមគ្រួសារ។
លោកស្រីថ្លែងថា លោកស្រី និងក្រុមគ្រួសារមិនចាប់អារម្មណ៍ ហើយក៏មិនដឹងត្រូវនិយាយយ៉ាងម៉េចចំពោះការសម្រេចរបស់តុលាការនេះដែរ ប៉ុន្តែទន្ទឹមនឹងនេះ លោកស្រីក៏មិនចង់ឱ្យសំណុំរឿងឃាតកម្មនេះត្រូវបិទបញ្ចប់ត្រឹមការកាត់ទោសបុគ្គល អឿត អាង ហៅ ជួប សម្លាប់ តែម្នាក់ដែរ៖ «ក្រុមគ្រួសារនៅស្ងៀមអត់ដឹងរកម៉េចឃើញ បើរកឃើញចេះតែរកទៅ រកអត់ឃើញទៅហើយ ចប់ត្រឹមហ្នឹងទៅ។ អត់ទេ (អត់ចង់ឲ្យគេបិទបញ្ចប់សំណុំរឿងត្រឹមហ្នឹងទេ) ចង់ឲ្យគេរកទៀត ប៉ុន្តែមិនដឹងថាគេរកយ៉ាងម៉េច? វាអត់ទាន់ច្បាស់លាស់។ វាអត់ច្បាស់លាស់ទាល់តែសោះ។ គាត់ទោសទៅគ្រាន់តែមើលទៅ វា (វីដេអូនៃការបាញ់សម្លាប់) ព្រិលៗអ៊ីចឹង ហើយគេកាត់ទោសកើតដែរ អ៊ីចឹងតាមគេទៅ។ គេកាត់យ៉ាងម៉េចកាត់ទៅ»។
កាលពីសប្ដាហ៍មុន សាលាដំបូងរាជធានីភ្នំពេញ បានសម្រេចផ្ដន្ទាទោស អឿត អាង ហៅ ជួប សម្លាប់ ឱ្យជាប់ពន្ធនាគារអស់មួយជីវិត ពីបទមនុស្សឃាតដោយចេតនា និងប្រើប្រាស់អាវុធខុសច្បាប់។ ការសម្រេចរបស់តុលាការនេះ ត្រូវបានក្រុមអ្នកគាំទ្របណ្ឌិត កែម ឡី ចាត់ទុកថា គ្រាន់តែជាសេចក្ដីសម្រេចមួយដ៏ប្រញាប់ប្រញាល់ ដើម្បីគេចវេះពីការទទួលខុសត្រូវ និងបញ្ចៀសការរិះគន់ពីមជ្ឈដ្ឋាននានាតែប៉ុណ្ណោះ។
ជាមួយគ្នានេះ អង្គការជាតិ និងអន្តរជាតិជាច្រើនក៏បានចេញសេចក្ដីថ្លែងការណ៍ជាបន្តបន្ទាប់រិះគន់ការសម្រេចសេចក្ដីនេះ។ ពួកគេលើកឡើងថា ដំណើរការកាត់ក្តីរបស់តុលាការក្រុងភ្នំពេញ នៅពុំទាន់អាចជម្រះមន្ទិលសង្ស័យ ពោលគឺនៅមានកង្វះខាតលើទិដ្ឋភាពសំខាន់ៗជាច្រើន និងពុំទាន់បំពេញគោលការណ៍ស៊ើបអង្កេតឱ្យបានសមស្របតាមស្តង់ដារអន្តរជាតិនៅឡើយទេ។ ពួកគេស្នើឱ្យអាជ្ញាធរបន្តការស៊ើបអង្កេតករណីឃាតកម្មនេះបន្ថែមទៀត។
ទោះបីជាយ៉ាងណា អ្នកនាំពាក្យតុលាការក្រុងភ្នំពេញ លោក លី សុផាណា បានបញ្ជាក់នៅថ្ងៃប្រកាសសាលក្រមផ្តន្ទាទោស ជួប សម្លាប់ នោះថា តុលាការមិនទាន់បិទសំណុំរឿងនេះទេ ដោយបន្តស៊ើបអង្កេតលើអ្នកពាក់ព័ន្ធផ្សេងទៀត។
គិតត្រឹមចុងខែមីនា នេះ មានរយៈពេលជិត ៩ខែ ដែលបណ្ឌិត កែម ឡី អ្នកវិភាគបញ្ហាសង្គម និងនយោបាយដ៏មានប្រជាប្រិយភាព ត្រូវបានឃាតកបាញ់សម្លាប់។ សពរបស់លោកត្រូវបានក្រុមគ្រួសារ និងប្រជាពលរដ្ឋដង្ហែយកទៅបញ្ចុះនៅផ្ទះរបស់លោក នៅឯស្រុកកំណើត ស្ថិតក្នុងភូមិអង្គតាកុប ឃុំលាយបូរ ស្រុកត្រាំកក់ ខេត្តតាកែវ។
ប្រជាពលរដ្ឋក្នុងខេត្តតាកែវ និងខេត្តដទៃទៀត បានចេញចូលទៅអុជធូបគោរពវិញ្ញាណក្ខន្ធរបស់លោកជាប្រចាំ។ សព្វថ្ងៃនេះ មានតែលោកស្រី ភោគ សេ អាយុ ៧៨ឆ្នាំ ដែលជាម្តាយរបស់បណ្ឌិត កែម ឡី តែម្នាក់ប៉ុណ្ណោះ ដែលនៅមើលការខុសត្រូវ និងថែរក្សាទីបញ្ចុះសពរបស់លោកទាំងយប់ ទាំងថ្ងៃ៕
ដោយ យ៉ង ចាន់តារា RFA 2017-03-28
Aucun commentaire:
Enregistrer un commentaire