នគរបាលការពារព្រំដែននៅខែត្រស្ទឹងត្រែង ឲ្យដឹងថា យោធាឡាវ បានឃាត់ខ្លួននគរបាលកម្ពុជា ម្នាក់កាលពីចុងខែកុម្ភៈ ក្រោមហេតុផលឆ្លងដែនខុសច្បាប់។ ចំណែកអាជ្ញាធរកម្ពុជា ក៏បានឃាត់ខ្លួនជនជាតិឡាវ ៦នាក់ដែរ នៅគ្រាដែលជនជាតិឡាវ ទាំងនោះបានលួចឆ្លងដែនមកកម្ពុជា ពុំមានលិខិតឆ្លងដែន។ បញ្ហានេះ អាជ្ញាធរខែត្រនៃប្រទេសទាំងពីរ កំពុងសម្របសម្រួលដោះស្រាយ។
សមត្ថកិច្ចការពារព្រំដែនកម្ពុជា-ឡាវ ថ្លែងនៅថ្ងៃទី៧ មីនា ថា នាយរងប៉ុស្តិ៍ការពារព្រំដែនកោះឫស្សីនៃស្រុកសៀមប៉ាង លោក សៀវ អ៊ិន ត្រូវបានអាជ្ញាធរឡាវ ឃាត់ខ្លួន គ្រាដែលលោកធ្វើដំណើរទៅលេងប្រពន្ធកូន ៤នាក់ដែលរស់នៅភូមិហាតញ៉ៃ នៃខែត្រអាតាពើ (Attapeu) ប្រទេសឡាវ កាលពីចុងខែកុម្ភៈ។
នគរបាលការពារព្រំដែនកម្ពុជា ថ្លែងសុំមិនបញ្ចេញឈ្មោះ បង្ហើបថា សមត្ថកិច្ចខែត្រស្ទឹងត្រែង បានឃាត់ខ្លួនពលរដ្ឋឡាវ ៦នាក់កាលពីចុងខែកុម្ភៈ និងកំពុងឃុំខ្លួននៅស្នងការដ្ឋានខែត្រស្ទឹងត្រែង បណ្ដោះអាសន្ន ហើយស្ថានទូតឡាវ ក៏កំពុងចរចាដោះស្រាយបញ្ហានេះដើម្បីសុំការដោះលែងវិញ។ លោកចាត់ទុកការឃាត់ខ្លួននេះ ទំនងជាភាគីប្រទេសទាំងពីរកំពុងចម្រូងចម្រាសរឿងព្រំដែន ខណៈកងកម្លាំងវិស្វកម្មរបស់កម្ពុជា កំពុងដំណើរការស្ថាបនាផ្លូវក្រវាត់ព្រំដែនខែត្រស្ទឹងត្រែង មានប្រវែងជាង ២០០គីឡូម៉ែត្រ ហើយបច្ចុប្បន្ន អភិវឌ្ឍបានជាង ១៥០គីឡូម៉ែត្រ៖ «គេមិនទាន់ដោះលែងដោយសារតែគេចរចាជាមួយស្ថានទូតឡាវ ប៉ុន្តែគេចង់ឲ្យភាគីឡាវ ដោះលែងអនុប្រធានប៉ុស្តិ៍កោះឫស្សីមកវិញ ហើយខាងខ្មែរយើងនឹងដោះដូរទៅវិញ»។
កាលពីពេលថ្មីៗនេះ អាជ្ញាធរខែត្រស្ទឹងត្រែង បានបញ្ជូនអភិបាលរងមួយរូបនៃខែត្រស្ទឹងត្រែង ដឹកនាំក្រុមការងារសម្របសម្រួលជាមួយភាគីឡាវ ក៏ប៉ុន្តែរហូតមកទល់ពេលនេះ ភាគីឡាវ ពុំទាន់ដោះលែងនគរបាលរបស់កម្ពុជា មកវិញនោះទេ។ ចំណែកប្រជាជនឡាវ ៦នាក់ អាជ្ញាធរកម្ពុជា ក៏ពុំទាន់ដោះលែងប្រគល់ជូនអាជ្ញាធរឡាវ វិញដែរ។
ទាក់ទងបញ្ហានេះ អ្នកនាំពាក្យសាលាខែត្រស្ទឹងត្រែង លោក ម៉ែន គុង ថ្លែងនៅថ្ងៃទី៧ មីនា ថា ក្រុមការងារខែត្រដែលដឹកនាំដោយអភិបាលរងខែត្រមួយរូប បានប្រជុំចរចាបញ្ហានេះជាមួយភាគីឡាវ រួចហើយ ដោយស្នើឲ្យមានការដោះលែងពលរដ្ឋកម្ពុជា ដែលយោធាឡាវ សង្ស័យថាជាកងកម្លាំងប្រដាប់អាវុធ។ លោកថា អាជ្ញាធរកម្ពុជា ក៏បានឃាត់ខ្លួនប្រជាជនឡាវ ដែរ នៅពេលឆ្លងចូលមកទឹកដីកម្ពុជា ដោយខុសច្បាប់ មិនបានជូនដំណឹងមកសមត្ថកិច្ចកម្ពុជា ហើយប្រតិបត្តិការឃាត់ខ្លួននេះ ពុំមែនជាការដាក់ទោសពៃរ៍នោះទេ គឺគ្រាន់តែជាការអប់រំណែនាំសម្របសម្រួលពីភាគីទាំងសងខាង នឹងបញ្ជូនត្រឡប់ទៅកាន់លំនៅឋានពួកគេវិញ៖ «យើងបានស្នើសុំគាត់ហើយ ខាងក្រុមការងារដែលដឹកនាំដោយអភិបាលរងខែត្រមួយរូប កាលពីថ្ងៃមុនបានដឹកនាំកម្លាំងចរចាគ្នាហ្នឹង ហើយភាគីគេហ្នឹងរាយការណ៍ជូនថ្នាក់ដឹកនាំរបស់គេ ដើម្បីសុំការសម្រេច ហើយគេនឹងទទួលយកសំណើរបស់ភាគីកម្ពុជា»។
ប្រទេសឡាវ បានបញ្ជូនកងកម្លាំងយោធាប្រដាប់អាវុធមករារាំងកងកម្លាំងវិស្វកម្មរបស់កម្ពុជា ឲ្យផ្អាកការស្ថាបនាផ្លូវតាមបណ្ដោយព្រំដែននៅចំណុចអូរតាក់ឡាវ នៃស្រុកសៀមប៉ាង ខែត្រស្ទឹងត្រែង កាលពីថ្ងៃទី១៩ ខែកុម្ភៈ ដោយលើកហេតុផលថា តំបន់នោះរដ្ឋាភិបាលនៃប្រទេសទាំងពីរមិនទាន់ឯកភាពគ្នាជាផ្លូវការបោះបង្គោលព្រំដែននៅឡើយ។ កាលពីចុងខែកុម្ភៈ យោធាឡាវ ក៏បានដកចេញពីទឹកដីរបស់កម្ពុជា ក្រោយពីមេដឹកនាំកម្ពុជា-ឡាវ បានឯកភាពគ្នាពន្លឿនដោះស្រាយបញ្ហាព្រំដែន និងដាក់ទិសដៅប្រែក្លាយតំបន់ព្រំដែននោះឲ្យក្លាយទៅជាតំបន់មិត្តភាព សន្តិភាព និងការអភិវឌ្ឍ។
ប្រធានអង្គការសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ ចាត់ទុកបញ្ហានេះ គឺជាការអនុវត្តច្បាប់រវាងប្រទេសនីមួយៗ។ លោកសង្កេតឃើញថា នគរបាល និងទាហានរបស់កម្ពុជា មួយចំនួនដែលមានកាតព្វកិច្ចការពារព្រំដែន បានយកប្រពន្ធជនជាតិឡាវ និងជនជាតិវៀតណាម បង្កផលប៉ះពាល់ឯករាជភាពកម្លាំងសមត្ថកិច្ច និងប៉ះពាល់ដល់ការងាររបស់កងកម្លាំងប្រដាប់អាវុធការពារព្រំដែន។ បញ្ហានេះ លោកចង់ឲ្យរដ្ឋាភិបាលយកចិត្តទុកដាក់ដោះស្រាយឲ្យបានហ្មត់ចត់៖ «វាអាចនឹងប៉ះពាល់ដល់ការអនុវត្តតួនាទីដល់កងកម្លាំងប្រដាប់អាវុធរបស់រដ្ឋាភិបាលដែរ នៅពេលពួកគេមានភារកិច្ចទៅការពារបូរណភាពទឹកដី ឬក៏ការពារអនុវត្តច្បាប់តាមព្រំដែនហ្នឹង បែរជាទៅមានសម្ពន្ធភាពជាមួយជនបរទេស។ ខ្ញុំថាវាជារឿងមួយដែរប៉ះពាល់ធ្ងន់ធ្ងរក្នុងការអនុវត្តតួនាទី»។
ទោះយ៉ាងណា អាជ្ញាធរខែត្រស្ទឹងត្រែង ពុំទាន់កំណត់ពេលនៃការដោះលែងនគរបាលកម្ពុជា ដែលឡាវ ចាប់ខ្លួននោះដែរ។ ចំណែកពលរដ្ឋឡាវ ៦នាក់នោះ សមត្ថកិច្ចខែត្រស្ទឹងត្រែង ក៏ពុំទាន់សម្រេចដោះលែងដែរ។
កន្លងទៅ ទាហានឡាវ ធ្លាប់បាញ់ពលរដ្ឋខ្មែរបណ្ដាលឲ្យស្លាប់ រងរបួស និងឃាត់ខ្លួននៅគ្រាដែលពលរដ្ឋខ្មែរឆ្លងដែនចូលទឹកដីឡាវ កាប់ឈើ៕
Aucun commentaire:
Enregistrer un commentaire