ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក វីល្លៀម ហៃដ្ដ (William Heidt) អះអាងនៅថ្ងៃទី៣ ខែកុម្ភៈ ថា សហរដ្ឋអាមេរិកមិនដែលបានពិភាក្សា ឬពិចារណាដល់ការលុបចោលបំណុលដែលកម្ពុជា ជំពាក់នោះទេ។
លោក វីល្លៀម ហៃដ្ដ ថ្លែងចំពោះមុខអ្នកសារព័ត៌មានក្នុងជំនួបតុមូលនៅស្ថានទូតសហរដ្ឋអាមេរិក ប្រចាំកម្ពុជា ថា តាំងពីលោកបានមកធ្វើការនៅស្ថានទូតសហរដ្ឋអាមេរិក ប្រចាំកម្ពុជា នៅទសវត្សរ៍ឆ្នាំ៩០ មក ការលុបចោលបំណុលដែលកម្ពុជា ជំពាក់សហរដ្ឋអាមេរិក មិនមែនជាប្រធានបទដែលសហរដ្ឋអាមេរិក ដាក់លើតុដើម្បីពិភាក្សានោះទេ ប៉ុន្តែលោកថា សហរដ្ឋអាមេរិក លើកទឹកចិត្តឲ្យមានការចរចាដើម្បីឈានដល់ការដោះស្រាយបញ្ហាបំណុលនេះ។
លោក វីល្លៀម ហៃដ្ដ បញ្ជាក់ដែរថា នៅក្នុងទសវត្សរ៍ឆ្នាំ៩០ ចំនួនបំណុលដែលកម្ពុជា ជំពាក់សហរដ្ឋអាមេរិក ក្នុងសម័យសាធារណរដ្ឋខ្មែរមិនដល់ ២០០លានដុល្លារនោះទេ ប៉ុន្តែរហូតមកទល់ពេលនេះ បំណុលនេះបានកើនដល់ជិត ៥០០លានដុល្លារសហរដ្ឋអាមេរិកទៅហើយ។ លោកថា រដ្ឋាភិបាលកម្ពុជា មិនគួរបន្តទុកឲ្យបំណុលនេះកើនឡើងនោះឡើយ ហើយគួរទទួលយកនូវកិច្ចព្រមព្រៀងតាំងពីទសវត្សរ៍ឆ្នាំ៩០។
ទោះជាយ៉ាងណាក៏ដោយ កន្លងទៅលោកនាយករដ្ឋមន្ត្រី ហ៊ុន សែន ថ្លែងថា បំណុលដែលកម្ពុជា ជំពាក់សហរដ្ឋអាមេរិក តាំងពីសម័យសាធារណរដ្ឋខ្មែរ គឺកម្ពុជា មិនអាចពិនិត្យបានឡើយ ដោយមិនដឹងថា បំណុលនេះកម្ពុជា យកទៅធ្វើអ្វីនៅពេលណាខ្លះ ដែលនេះ លោក ហ៊ុន សែន ថាផ្ទុយពីបំណុលកម្ពុជា ជំពាក់ប្រទេសរុស្សី ដែលកម្ពុជា អាចពិនិត្យបាន។
កាលពីពេលថ្មីៗនេះទៀត លោក ហ៊ុន សែន ក៏បានស្នើឲ្យសហរដ្ឋអាមេរិក លុបបំណុលកម្ពុជា ដោយលោកចាត់ទុកថា វាជាបំណុលកខ្វក់។ ក្រៅពីទាមទារឲ្យអាមេរិកលុបចោលបំណុល លោក ហ៊ុន សែន ក៏ទាមទារឲ្យសហរដ្ឋអាមេរិក ទទួលខុសត្រូវផ្ដល់ជំនួយដល់កម្ពុជា សម្រាប់បម្រើដល់ការដោះមីន និងគ្រាប់មិនទាន់ផ្ទុះដែលបានបន្សល់តាំងពីទសវត្សរ៍ឆ្នាំ៧០ ទៀតផង៕
Aucun commentaire:
Enregistrer un commentaire