ចៅក្រមសាលាដំបូងរាជធានីភ្នំពេញ សម្រេចចោទប្រកាន់សកម្មជនបឹងកក់២នាក់ គឺអ្នកស្រី ទេព វន្នី និងលោកស្រី បូវ សោភា ពីបទញុះញង់ឲ្យប្រព្រឹត្តិបទឧក្រិដ្ឋជាអាទិ៍ តាមមាត្រា៤៩៥ នៃក្រមព្រហ្មទណ្ឌ។
ព្រះរាជអាជ្ញារង និងជាអ្នកនាំពាក្យសាលាដំបូងរាជធានីភ្នំពេញ លោក លី សុផាណា ថ្លែងឲ្យតាមបណ្ដាញទំនាក់ទំនងតេឡេក្រាម (Telegram) នៅល្ងាចថ្ងៃទី១៧ សីហា ថា បន្ទាប់ពីដំណើរការសវនាការ ចៅក្រមជំនុំជម្រះសម្រេចឃុំខ្លួនជនជាប់ចោទទាំង២រូបគឺអ្នកស្រី ទេព វន្នី និងលោកស្រី បូវ សោភា នៅពន្ធនាគារព្រៃស ជាបណ្ដោះអាសន្ន ហើយនឹងបន្តសវនាការនៅព្រឹកថ្ងៃទី២២ ខែសីហា។
មាត្រា៤៩៥ នៃក្រមព្រហ្មទណ្ឌ ចែងអំពីបទញុះញង់ឲ្យប្រព្រឹត្តិបទឧក្រិដ្ឋជាអាទិ៍ ថា អំពើញុះញង់ដោយផ្ទាល់ឲ្យប្រព្រឹត្តិបទឧក្រិដ្ឋ ឬប្រព្រឹត្តិអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម តាមមធ្យោបាយណាមួយ ក្នុងចំណោមមធ្យោបាយ ដែលចែងក្នុងមាត្រា៤៩៥ នៃក្រមព្រហ្មទណ្ឌ នឹងត្រូវផ្ដន្ទាទោសដាក់ពន្ធនាគារ ពី៦ខែ ដល់២ឆ្នាំ និងពិន័យជាប្រាក់ពី១លាន ដល់៤លានរៀល បើការញុះញង់នេះគ្មានប្រសិទ្ធភាពទេ។
អ្នកស្រី ទេព វន្នី ថ្លែងពេលដែលសមត្ថកិច្ចបញ្ជូនមកដល់តុលាការកាលពីព្រឹកមិញថា សមត្ថកិច្ចខណ្ឌដូនពេញបានសាកសួរអ្នកស្រី ទេព វន្នី និងអ្នកស្រី បូវ សោភា ពីប្រភពនៃទីងមោង ក្រវិល ទៀន ធូប ទង់អង្គការសហប្រជាជាតិ ទង់ជាតិ រួមនឹងសម្ភារៈផ្សេងទៀត ដែលសហគមន៍បឹងកក់ យកមកធ្វើយុទ្ធនាការថ្ងៃច័ន្ទពណ៌ខ្មៅ។
ទោះយ៉ាងណា អ្នកស្រី ទេព វន្នី ឆ្លើយតបថា មិនមានច្បាប់ណាមួយហាមប្រាមពលរដ្ឋមិនឲ្យយកសម្ភារៈទាំងនេះ រៀបចំយុទ្ធនាការតស៊ូមតិនោះទេ។
ចំណែកពលរដ្ឋដែលរស់នៅក្នុងសហគមន៍ផ្សេងទៀតក្នុងរាជធានីភ្នំពេញប្រមាណ២០នាក់ ក៏មកជួបជុំគ្នានៅមុខតុលាការ កាន់បដាស្រែកទាមទារ ឲ្យដោះលែងអ្នកស្រី ទេព វន្នី និងលោកស្រី បូវ សោភា។
 |
| សកម្មជននៃសហគមន៍បឹងកក់ស្រែកតវ៉ា នៅមុខសាលាដំបូងរាជធានីភ្នំពេញ ដើម្បីឲ្យដោះលែងតំណាងសហគមន៍បឹងកក់២នាក់ គឺអ្នកស្រី ទេព វន្នី និងលោកស្រី បូវ សោភា នៅព្រឹកថ្ងៃទី១៧ ខែសីហា ឆ្នាំ២០១៦។ RFA/Cheu Sideth |
តំណាងសហគមន៍ជម្លោះដីធ្លីនៅតំបន់បឹងកក់ អ្នកស្រី ទេព វន្នី និងលោកស្រី បូវ សោភា ត្រូវបានសមត្ថកិច្ចខណ្ឌដូនពេញ ឃុំខ្លួនសាកសួរ ក្រោយពីចាប់ខ្លួនអ្នកទាំង២ កាលពីល្ងាចថ្ងៃច័ន្ទ ទី១៥ សីហា ក្នុងពេលធ្វើយុទ្ធនាការ «ថ្ងៃច័ន្ទពណ៌ខ្មៅ» ដែលធ្វើឡើងនៅក្នុងសហគមន៍បឹងកក់ ដើម្បីបន្តទាមទារឲ្យដោះលែងសកម្មជនសិទ្ធិមនុស្ស អ្នកទោសមនសិការ ទាមទារឲ្យស្វែងរកយុត្តិធម៌ជូនបណ្ឌិត កែម ឡី និងទាមទារឲ្យអាជ្ញាធរដោះស្រាយជម្លោះដីធ្លីក្នុងសហគមន៍ពួកគាត់ឲ្យចប់សព្វគ្រប់។
សូមស្ដាប់ព័ត៌មានពិស្ដារ៖
Aucun commentaire:
Enregistrer un commentaire