 |
| អ្នកទស្សនាកំពុងតាមដានមើលកសណិសាក្សីរបស់ជនរងគ្រោះ នៅចំពោះមុខចៅក្រមរបស់សាលាក្តីខ្មែរក្រហម។ ពិព័រណ៍ «ខ្ញុំចង់បានយុត្តធម៌» បង្ហាញកិច្ចខិតខំប្រឹងប្រែងនាំយកឧក្រិដ្ឋជននៃ របបដ៏សាហាវយង់ខ្នងនេះមកកាត់ទោសនៅសាលាក្តីខ្មែរក្រហម។ |
ជនសង្ស័យម្នាក់នៃសំណុំរឿងបន្ថែម ០០៣ គឺលោក មាស មុត បានថ្លែងថា លោកមិនអាចធ្វើតាមដីកាបង្គាប់របស់សហចៅក្រមស៊ើបអង្កេតតុលាការ ខ្មែរក្រហមម្នាក់បានទេ ដោយសារនីតិវិធីតម្រូវឲ្យមានហត្ថលេខាពីរក្នុងការកោះ ហៅរូបលោកទៅកាន់តុលាការ។
សហចៅក្រមស៊ើបអង្កេតនៃសាលាក្តីខ្មែរក្រហមដែលចូលរួមដោយអ.ស.ប.គឺ លោក ម៉ាក ហាមុន បានខកខានជាច្រើនលើកចាប់តាំងពីចុងឆ្នាំទៅ ក្នុងការចាប់ ខ្លួន ឬកោះហៅជនសង្ស័យពីរនាក់គឺ លោក មាស មុត និងអ្នកស្រី អ៊ឹម ចែម ជាជនសង្ស័យក្នុងសំណុំរឿង០០៣ និង ០០៤ មកបំភ្លឺដើម្បីបញ្ចប់ការស៊ើបអង្កេត របស់លោក។
គេដឹងថា តាមការចោទប្រកាន់របស់សហព្រះរាជអាជ្ញា ដែលថា ជនទាំងពីរមានការពាក់ព័ន្ធនឹងឧក្រិដ្ឋកម្ម ការកាប់សម្លាប់ពលរដ្ឋខ្មែរស្លូតត្រង់ ជាច្រើននាក់ក្នុងទសវត្សរ៍១៩៧០។ ការខកខាននោះគឺ សហចៅក្រមភាគីកម្ពុជា លោក យូ ប៊ុនឡេង មិនយល់ស្របនឹងចៅក្រមអន្តរជាតិ ម៉ាក ហាមុន ដោយសារថាអាជ្ញាធរ និងជនជាប់ចោទមិនបានសហការ។ លោកបានដាក់ពាក្យសុំលាឈប់ពីការងារនៅសប្តាហ៍នេះ ដោយបញ្ហាផ្ទាល់ខ្លួន តែការលាលែងនេះកើតឡើង ក្រោយពេលដែលការសហការមិនបានកើតឡើង ហើយរឿងក្តី ដែលរដ្ឋាភិបាលធ្លាប់បានរារាំងនេះត្រូវរាំងស្ទះដំណើរការនីតិវិធី។
ថ្លែងប្រាប់វីអូអេតាមទូរស័ព្ទកាលពីថ្ងៃព្រហស្បតិ៍ លោក មាស មុត បានអះអាង ថា លោកមិនបានធ្វើតាមដីកាតុលាការដោយសារតែមានហត្ថលេខាសហចៅក្រមតែម្នាក់ក្នុងចំណោមពីរនាក់។
លោកថ្លែងតាមខ្លឹមសារដើមថា៖
«រឿងហ្នឹងខុសច្បាប់ដែលចែងថា ត្រូវមានសហមេធាវី សហចៅក្រម សហព្រះ រាជអាជ្ញា»។
លោក មាស មុត បានបន្ថែមដែរថា លោក ហាមុន បានកោះហៅលោកពីរលើក កាលពីឆ្នាំទៅ និងកាលពីដើមខែមិថុនាម្តង៖
«មែនទែនទៅ ខ្ញុំគ្មានគំនិតរត់ចោលស្រុកទេ។ បើចាំបាច់ថា ត្រូវមានទោស ត្រូវនិយាយគ្នាតាមផ្លូវច្បាប់»។
តាមច្បាប់របស់តុលាការបាននិយាយថា ទោះជាចៅក្រមមានការខ្វែងគំនិតគ្នា ក្តី តែនីតិវិធីស៊ើបអង្កេតមិនអាចត្រូវរាំងស្ទះបានទេ ដែលមានន័យថាអាជ្ញាធរ ត្រូវតែអនុវត្តតាមដីកាតុលាការក្នុងការចាប់ខ្លួន ឬនាំខ្លួនជនជាប់ចោទ។
ជនជាប់ចោទម្នាក់ទៀតគឺ អ្នកស្រី អ៊ឹម ចែមធ្លាប់បានប្រាប់វីអូអេកាលពីដើម ឆ្នាំដែរថា លោកស្រីក៏មិនធ្វើតាមដីកាតុលាការដែរដោយសារតែអ្នកស្រីអះអាងថា អ្នកស្រីគ្មានជាប់ពាក់ព័ន្ធនឹងបទចោទ។
លោក ស្ទីវិន រ៉ែប (Stephen Rapp) ឯកអគ្គរដ្ឋទូតគោរចស.រ.អា.ទទួលបន្ទុកឧក្រិដ្ឋកម្មសង្គ្រាមបានចេញមុខបញ្ជាក់ចំៗពីការគ្មានឆន្ទៈរបស់រដ្ឋាភិបាលកម្ពុជា ក្នុងការចាប់ខ្លួនជនសង្ស័យជាអតីតកម្មាភិបាលខ្មែរក្រហមពីរនាក់ដែលចៅក្រមបានចោទប្រកាន់នោះមកកាន់តុលាការដើម្បីបំពេញនីតិវិធីច្បាប់។ លោកបាន ជំរុញដល់រដ្ឋាភិបាលកម្ពុជាត្រូវចាប់ខ្លួនជនសង្ស័យតាមនីតិវិធី។ ការថ្លែង យ៉ាងដូច្នេះដោយសារថា រយៈពេលពីរឆ្នាំជាងហើយដែលអាជ្ញាធរកម្ពុជាមិនបានសហការក្នុងការចាប់ខ្លួនជនសង្ស័យក្នុងសំណុំរឿងខ្មែរក្រហម០០៣ និង០០៤ ដែលរដ្ឋាភិបាលលោកហ៊ុន សែនធ្លាប់បានរារាំងជាសាធារណៈ៕
សុខ ខេមរា10 កក្កដា 2015
Aucun commentaire:
Enregistrer un commentaire