នាយករដ្ឋមន្រ្តីជប៉ុន លោកស៊ីនហ្សូ អាបេ |
រដ្ឋាភិបាលជប៉ុន និងធនាគារអភិវឌ្ឍន៍អាស៊ី
ADBនឹងបង្កើនទឹកប្រាក់វិនិយោគរៀងៗខ្លួន ប្រមាណ ៣០ភាគរយ បន្ថែមទៀត
សម្រាប់គម្រោងវិនិយោគហេដ្ឋារចនាសម្ព័ន្ធ នៅអាស៊ី។
នាយករដ្ឋមន្រ្តីជប៉ុន លោកស៊ីនហ្សូ អាបេ កាលពីថ្ងៃព្រហស្បតិ៍ទី ២១ឧសភា
បានប្រកាសគម្រោងវិនិយោគក្នុងទំហំទឹកប្រាក់ ១១០ពាន់លានដុល្លារ
សម្រាប់រយៈពេល ៥ឆ្នាំខាងមុខ។
រដ្ឋាភិបាលជប៉ុន
តាមរយៈធនាគារអភិវឌ្ឍន៍អាស៊ី
ADBនឹងបង្កើនទឹកប្រាក់វិនិយោគប្រមាណ៣០ភាគរយ បន្ថែមទៀត
សម្រាប់ជួយគាំទ្រគម្រោងអភិវឌ្ឍន៍ហេដ្ឋារចនាសម្ព័ន្ធនៅអាស៊ី
នៅក្នុងរយៈពេល ៥ឆ្នាំទៅមុខ។ តាមនាយករដ្ឋមន្រ្តី ជប៉ុន
ដែលបានប្រកាសដំណឹងនេះ កាលពីថ្ងៃព្រហស្បតិ៍ គម្រោងវិនិយោគសរុប
១១០ពាន់លានដុល្លារ
នឹងត្រូវយកទៅប្រើដើម្បីជំរុញការសាងសង់ហេដ្ឋារចនាសម្ព័ន្ធ
ប្រកបដោយគុណភាព និងការបង្កើតថ្មី នៅអាស៊ី។
ជប៉ុនចង់ផ្តោតប្រើទុនវិនិយោគ ទៅលើការបង្កើតការងារ ការផ្ទេរ
បញ្ជូនបច្ចេកវិទ្យា ក្នុងការសាងសង់រទេះភ្លើងក្រោមដី
ដែលប្រើថាមពលតិចតួច ឬការសាងសង់ស្ពានដែលស៊ូ
ធន់នឹងគ្រោះថ្នាក់រញ្ជួយដីជាដើម។
រដ្ឋាភិបាលជប៉ុននឹងប្រើមូលនិធិសាធារណៈ និងឯកជន
ដើម្បីយកទៅបំពេញបន្ថែមគម្រោងទុនវិនិយោគរបស់ធនាគារអភិវឌ្ឍន៍
អាស៊ី។ គំនិតផ្តួចផ្តើមរបស់ជប៉ុន
ដែលជាម្ចាស់ហ៊ុនធំជាងគេរបស់ធនាគារអភិវឌ្ឍន៍អាស៊ីរួចទៅហើយនោះ
ត្រូវបានគេមើលឃើញថា
ជាយុទ្ធសាស្រ្តថ្មីដែលជប៉ុនចង់ប្រើយកទៅទប់ទល់
ប្រជែងនឹងធនាគារអាស៊ី ដើម្បីអភិវឌ្ឍន៍ហេដ្ឋារចនាសម្ព័ន្ធ
ដែលចិនកំពុងបង្កើតឡើង និងដែលចូលរួមពីប្រទេស ចំនួន
៥០នៅក្នុងពិភពលោក។
គម្រោងទឹកប្រាក់វិនិយោគទៀតសោត គឺមានទំហំប្រហាក់ប្រហែលគ្នា
ដោយគ្រាន់តែគម្រោងវិនិយោគរបស់ជប៉ុនមានច្រើនជាងចិន ប្រមាណ
១០ពាន់លានតែប៉ុណ្ណោះ។ ប្រទេសប្រមាណ ៥០ដែលមានតាំងពីអង់គ្លេស
និងអ៊ីរ៉ង់
បានប្រកាសចូលរួមជាសមាជិករបស់ធនាគារដែលមានទំហំទឹកប្រាក់វិនិយោគ
១០០ពាន់លានដុល្លារ ដែល៥០ភាគរយជាចំណែកចូលរួមរបស់ចិន។
ទីក្រុងតូក្យូ
និងវ៉ាស៊ីនតោនដែលជាម្ចាស់ហ៊ុនសំខាន់របស់ធនាគារអភិវឌ្ឍន៍អាស៊ី
និងធនាគារពិភពលោកបានព្យាយាមមិនបានសម្រេច
ក្នុងការបញ្ចុះបញ្ចូលប្រទេសដទៃ
និងសម្ព័ន្ធមិត្តកុំឲ្យចូលរួមក្នុងគម្រោងរបស់ចិន។
អាមេរិកធ្លាប់បានលើកយកហេតុផលថា ធនាគារថ្មី បង្កើតដោយចិន
នឹងមិនអាចធានាតម្លាភាព ឬក៏អាចដាក់លក្ខខណ្ឌតឹងរ៉ឹង
ទាមទារឲ្យមានការគោរពសិទ្ធិមនុស្ស ដូចដែល ធនាគារពិភពលោក
ឬធនាគារអភិវឌ្ឍន៍អាស៊ីធ្លាប់ធ្វើកន្លងមកនោះទេ។
អ្នកជំនាញមើលឃើញថា ការប្រកួតប្រជែងខាងផ្តល់ទុនវិនិយោគ
រវាងប្រទេសមហាអំណាចសេដ្ឋកិច្ច នឹងហុចប្រយោជន៍ច្រើន ដល់អាស៊ី
ដែលត្រូវការទឹកប្រាក់សម្រាប់វិនិយោគលើហេដ្ឋារចនាសម្ព័ន្ធ
ទូរគមនាគមន៍ និងថាមពល។ តាមធនាគារអភិវឌ្ឍន៍ អាស៊ី ពីឆ្នាំ
២០១០ដល់ឆ្នាំ២០២០ គេត្រូវការបោះទុនវិនិយោគនៅអាស៊ី ប្រមាណ ៨ពាន់
ពាន់លានដុល្លារ៕
REUTERS/Thomas Peter