Tue, 28 April 2015
រដ្ឋមន្ត្រីការបរទេសអូស្ត្រាលី លោកស្រី ជូលី ប៊ីសប់ ប្រាប់អ្នកកាសែត។ AFP |
ក្រុងស៊ីដនីៈ អូស្ត្រាលីកាលពី ថ្ងៃចន្ទ បានជំរុញឲ្យឥណ្ឌូនេស៊ីធ្វើឲ្យប្រាកដថា គ្រប់ដំណើរការផ្លូវច្បាប់ គឺត្រូវតែជ្រះស្រឡះពីអំពើពុករលួយ មុនពេលប្រហារជីវិត ពលរដ្ឋពីររូបរបស់ខ្លួន ខណៈការចោទប្រកាន់ទទួលសំណូក បាន លេចឡើងទាក់ទងនឹងសវនាការជួញដូរគ្រឿងញៀនពួកគេ។
រដ្ឋមន្ត្រីការបរទេស លោកស្រី ជីលី ប៊ីសប់ បានថ្លែងទៅកាន់ សមភាគីឥណ្ឌូនេស៊ីរបស់លោកស្រី គឺលោកស្រី រ៉េតណូ ម៉ារស៊ូដា ពីរាត្រីថ្ងៃអាទិត្យ ខណៈនាយករដ្ឋមន្ត្រី លោក ថូនី អាបុត បានសរសេរទៅកាន់ប្រធានាធិបតី លោក ចូកូ វីដូដូ ដើម្បីអង្វរករជាថ្មីម្តងទៀត ដើម្បីឲ្យបញ្ឈប់ការប្រហារជីវិតនោះ។
អ្នករត់ពន្ធគ្រឿងញៀន Bali Nine លោក Myuran Sukumaran និងលោក Andrew Chan អាចប្រឈមមុខនឹងក្រុមបាញ់កាំភ្លើងត្រឹមថ្ងៃអង្គារ ជាមួយ ទណ្ឌិតផ្សេងទៀតមកពីប្រេស៊ីល នីហ្សេរីយ៉ា ហ្វីលីពីន និងឥណ្ឌូនេស៊ី។
ប្រព័ន្ធផ្សព្វផ្សាយអូស្ត្រាលី បាន បង្ហាញរូបថតឈើឆ្កាងដែលរៀបចំដោយអ្នករៀបចំបុណ្យខ្មោចម្នាក់ ដែលនឹងត្រូវប្រើដាក់មុខមឈូសពួកគេ ដោយចារអក្សរជាមួយថ្ងៃ 29.04.2015។
លោកស្រី ប៊ីសប់ បានថ្លែងថា លោកស្រីមិនមានដំបូន្មានផ្លូវការលើថាពេលណាពួកគេអាចត្រូវសម្លាប់ទេ ប៉ុន្តែវាអាចជាថ្ងៃទី ២៩ មេសា។ លោកស្រីបាននិយាយ ថា អ្នកទាំងនោះនឹងមិនត្រូវប្រហារជីវិតទេ ខណៈបញ្ហាផ្លូវច្បាប់នៅមាននៅឡើយ។
វិទ្យុ ABC បាននិយាយថា៖ «ខ្ញុំនឹងបង្ហាញថា មេធាវីរបស់លោក Chan និងលោក Sukumaran កំពុងបន្តស្វែងរកវិធានការនៅចំពោះមុខតុលាការធម្មនុញ្ញឥណ្ឌូនេស៊ី ហើយក៏មានការស៊ើបអង្កេត ដាច់ដោយឡែកមួយ ដំណើរការ ដោយគណៈកម្មការតុលាការឥណ្ឌូនេស៊ីចំពោះរាល់ការអះអាងអំពើពុករលួយចំពោះការជំនុំជម្រះដំបូង ហើយដំណើរការក្តីទាំងពីរនេះ បានចោទបញ្ហាអំពីសុចរិតភាពនៃការកាត់ទោស និងការអត់ឱនទោស។»។
លោកស្រី បានបន្ថែមថា៖ «ខ្ញុំបានស្នើដល់រដ្ឋមន្ត្រីការបរទេស ម៉ាស៊ូឌីថា ពុំមានវិធានការណា មួយត្រូវបានធ្វើទាក់ទងនឹងការប្រហារជីវិតដែលបានស្នើនោះទេរហូតដល់ដំណើរការផ្លូវច្បាប់ទាំងនេះត្រូវបានកំណត់»។
កាលពីថ្ងៃចន្ទប្រព័ន្ធផ្សព្វផ្សាយ Fairfax Media បានចេញផ្សាយ រាល់ការចោទប្រកាន់ពុករលួយរបស់ក្រុមចៅក្រមដែលបានកាត់ទោសអ្នកទាំងពីរនៅក្នុងឆ្នាំ ២០០៦ ដោយអះអាងថា ពួកគេត្រូវបានគេទារជាង ១ ពាន់លានរូព្យ៉ាស់ (ប្រមាណ ១៣៣ ពាន់ដុល្លារអូស្ត្រាលី) ដើម្បីផ្តល់ទោសតិចជា ២០ ឆ្នាំ៕ IN