អង្គការទន្លេអន្តរជាតិ (International Rivers) អំពាវនាវឲ្យមេដឹកនាំប្រទេសតាមដងទន្លេមេគង្គ ផ្អាកគម្រោងសាងសង់ទំនប់វារីអគ្គិសនីបន្ថែមទៀត ដោយសារផលប៉ះពាល់ខ្លាំងនៃទំនប់វារីអគ្គិសនី ទៅលើជីវភាពរស់នៅរបស់សហគមន៍។
នៅក្នុងសេចក្ដីថ្លែងការណ៍កាលពីថ្ងៃទី០៥ ខែមេសា អង្គការទន្លេអន្តរជាតិ ស្នើសុំឲ្យមេដឹកនាំរដ្ឋាភិបាលទាំងនោះ ទទួលស្គាល់នូវសារសំខាន់ នៃរបាយការណ៍ស្រាវជ្រាវ និងអនុសាសន៍ឆ្នាំ២០១១ ដែលបានមកពីការសិក្សាស្រាវជ្រាវរបស់ក្រុមប្រឹក្សា នៃគណៈកម្មាធិការទន្លេមេគង្គ អំពីផលប៉ះពាល់នៃហេដ្ឋារចនាសម្ព័ន្ធផ្លូវទឹក ជាពិសេសទំនប់វារីអគ្គិសនី នៅក្នុងអាងទន្លេមេគង្គក្រោម។
អង្គការអន្តរជាតិ ដែលមានបេសកកម្មការពារទន្លេ និងសិទ្ធិរបស់ពលរដ្ឋ ដែលរស់នៅអាស្រ័យលើទន្លេនេះ ស្នើសុំឲ្យសិក្សារួមគ្នានៅក្នុងតំបន់ ឲ្យបានល្អិតល្អន់ជាមុនសិន អំពីផលប៉ះពាល់ នៃទំនប់វារីអគ្គិសនី មុននឹងសម្រេចសាងសង់វា។
សេចក្តីថ្លែងការណ៍នេះ ធ្វើឡើងស្របពេល ដែលគណៈកម្មាការទន្លេមេគង្គលើកទី៣ បានបិទបញ្ចប់កិច្ចប្រជុំកំពូលរបស់ខ្លួន នៅខេត្តសៀមរាប កាលពីថ្ងៃទី០៥ ខែមេសា។ គណៈកម្មការទន្លេមេគង្គ បានជជែកអំពីបញ្ហានៃការកាប់បំផ្លាញព្រៃឈើ ផលប៉ះពាល់នៃការប្រែប្រួលអាកាសធាតុ បញ្ហាថាមពលអគ្គិសនី និងបញ្ហាប្រឈមផ្សេងៗ ទៀត។ កម្ពុជា ជាប្រទេសដឹកនាំកិច្ចប្រជុំនៅឆ្នាំនេះ។
ប្រទេសតាមដងទន្លេមេគង្គ រួមមាន ចិន មីយ៉ាន់ម៉ា (ភូមា) ឡាវ ថៃ និងវៀតណាម ទទួលស្គាល់នូវបញ្ហាកំណើនប្រជាជន កំណើនតម្រូវការទឹក ម្ហូបអាហារ ការបាត់បង់សម្បត្តិបរិស្ថាន និងជលផល ថាសុទ្ធតែជាបញ្ហា ដែលត្រូវរួមគ្នាដោះស្រាយ និងកំណត់កិច្ចសហប្រតិបត្តិការទៅអនាគត ដើម្បីប្រសិទ្ធភាព និងអភិវឌ្ឍប្រកបដោយចិរភាព សម្រាប់អាងទន្លេមេគង្គ។
អង្គការសង្គមស៊ីវិលផ្នែកបរិស្ថាន សម្តែងការព្រួយបារម្ភយ៉ាងខ្លាំង អំពីផលប៉ះពាល់នៃទំនប់វារីអគ្គិសនីធំៗ ចំនួន៦ ដែលប្រទេសចិនបានសង់នៅលើដងទន្លេមេគង្គ ក្នុងប្រទេសចិន និងគម្រោងសាងសង់ទំនប់វារីអគ្គិសនីចំនួន១២០ ដែលគ្រោងសង់ត្រឹមឆ្នាំ២០៤០ នៅប្រទេសតាមដងទន្លេមេគង្គនេះ។ ទំនប់វារីអគ្គិសនីទាំងនេះ បង្កការគំរាមកំហែងយ៉ាងធ្ងន់ធ្ងរ ដល់ប្រព័ន្ធជីវៈចម្រុះ បរិស្ថាន និងជីវភាពនៅរបស់ប្រជាពលរដ្ឋរាប់លាននាក់ ដែលរស់នៅផ្នែកខាងក្រោម នៃទន្លេមេគង្គ។
លោកនាយករដ្ឋមន្ត្រី ហ៊ុន សែន បានធ្វើសន្និសីទបិទបញ្ចប់កិច្ចប្រជុំនោះ ប៉ុន្តែ មិនអនុញ្ញាតឲ្យមានការសួរសំណួរ ពីអ្នកសារព័ត៌មាននោះឡើយ៕
ដោយ មួង ណារ៉េត
2018-04-06
2018-04-06
Aucun commentaire:
Enregistrer un commentaire