ភ្នំពេញៈ រឿងបច្ច័យបុណ្យសពលោកបណ្ឌិត កែម ឡី សាលាដំបូងរាជធានីភ្នំពេញបានសម្រេចធ្វើការចោទប្រកាន់ និងបញ្ជាឲ្យចាប់ខ្លួនសមាជិកគណៈកម្មការបុណ្យសពដែលមកពីអង្គការក្រៅរដ្ឋាភិបាលចំនួន ៣ រូបទៅតាមពាក្យបណ្តឹងរបស់ប្រធានគណបក្សមួយដែលពុំមានជាប់សាច់ឈាមអ្វីសោះជាមួយលោក កែម ឡី ខណៈដែលសមាជិកគ្រួសារសពបាននិយាយថា ជនទាំង ៣ អង្គ/រូប ដែលរងការចោទប្រកាន់មិនមែនជាអ្នកកាន់លុយបុណ្យសពនោះទេ។
យោងតាមដីកាសន្និដ្ឋានបញ្ជូនរឿងឲ្យស៊ើបសួរចុះថ្ងៃទី ៤ ខែមករារបស់លោក គុជ គឹមឡុង ព្រះរាជអាជ្ញារងនៃអយ្យការអមសាលាដំបូងរាជធានីបានបញ្ជាក់ថាសមាជិកគណៈកម្មការបុណ្យសពលោកបណ្ឌិត កែម ឡី ដែលរួមមានព្រះសង្ឃ ប៊ុត ប៊ុនតិញ លោក មឿន តុលា និងលោក ប៉ា ងួនទៀង ត្រូវបានព្រះរាជអាជ្ញាររូបនេះចោទប្រកាន់ពីបទ «រំលោភលើទំនុកចិត្ត» តាមមាត្រា ៣៩១ និង ៣៩២ នៃក្រមព្រហ្មទណ្ឌ។ តាមបទចោទនេះពួកគាត់ប្រឈមមុខនឹងការជាប់ពន្ធនាគារពី ៦ ខែទៅ ៣ ឆ្នាំ និងពិន័យជាប្រាក់ពី ១ លានទៅ ៦ លានរៀល។
ដីកាសន្និដ្ឋានរបស់លោក គុជ គឹមឡុង បានរៀបរាប់អង្គហេតុថាកាលពីថ្ងៃទី ២៦ ខែសីហា ឆ្នាំ ២០១៦ ម្តាយ និងប្រពន្ធបណ្ឌិត កែម ឡី បានប្រគល់សិទ្ធិឲ្យលោកទាំង ៣ នាក់ធ្វើជាតំណាងនៃគណៈកម្មការចាត់ចែង និងគ្រប់គ្រងថវិកាបុណ្យថ្ងៃបុណ្យខួប ១០០ ថ្ងៃគឺពីថ្ងៃទី ១៤ ដល់ថ្ងៃទី ១៧ ខែតុលា ឆ្នាំ ២០១៦។
កាលពីខែកញ្ញាឆ្នាំ ២០១៧ លោក ពេជ្រ ស្រស់ បានដាក់ពាក្យប្តឹងគណៈកម្មការនេះដោយចោទថាទឹកប្រាក់យ៉ាងតិចមានប្រហែល ៣០ ម៉ឺនដុល្លារដែលប្រមូលបានពីថ្ងៃបូជាសពរហូតដល់ថ្ងៃបុណ្យ ១០០ ថ្ងៃមិនត្រូវបានប្រគល់ទៅឲ្យក្រុមគ្រួសារលោក កែម ឡី នៅឡើយ។
ការសម្រេចរបស់លោក គឹមឡុង គឺដាក់លោកទាំង ៣ អង្គ/នាក់ស្ថិតក្រោមការត្រួតពិនិត្យ និង «ដាក់ឲ្យស្ថិតក្រោមការឃុំខ្លួនបណ្ដោះអាសន្នលើឈ្មោះខាងលើ ដើម្បីបង្ការ ឬបញ្ចប់បទល្មើសកុំឲ្យកើតឡើងសាជាថ្មី និងធានារក្សាជនត្រូវចោទទុកជូនតុលាការចាត់ការតាមនីតិវិធី»។
លោក ពេជ្រ ស្រស់ ដើមបណ្ដឹងក្នុងសំណុំរឿងនេះថ្លែងថាលោកមិនដឹងថា តុលាការប្រមូលភ័ស្តុតាងពីណាដើម្បីដាក់ការចោទប្រកាន់នេះទេ។
ប៉ុន្តែលោកថា៖ «ក្នុងនាមខ្ញុំជាដើមបណ្ដឹង ខ្ញុំបានគិតរួចហើយថាវាមានទម្ងន់ទោសព្រោះខ្ញុំមានភ័ស្តុតាងតាមការបង្ហើបប្រាប់ច្បាស់លាស់ពីប្អូនរបស់លោក កែម ឡី គឺថាគណៈកម្មការនោះប្រព្រឹត្តបទល្មើសរួចទៅហើយ។ ក្នុងអារម្មណ៍របស់ខ្ញុំគ្មានអ្វីក្រៅពីសាទរចំពោះតុលាការដែលខំធ្វើកិច្ចការងារហ្នឹង»។
លោក ពេជ្រ ស្រស់ និយាយថាថវិកាដែលលោកថាមានប្រហែល ៣០ ម៉ឺនដុល្លារនោះគឺគ្រាន់តែជាការប៉ាន់ប្រមាណរបស់លោកតាមព័ត៌មានដែលលោកទទួលបានពីប្អូនរបស់លោកបណ្ឌិត កែម ឡី។
ក្នុងសំណុំរឿងនេះមានតែលោក មឿន តុលា ជាប្រធានអង្គការសង់ត្រាល់មួយទេ ដែលបានចូលបំភ្លឺជាមួយព្រះរាជអាជ្ញា គុជ គឹមឡុង កាលពីពេលកន្លងទៅខណៈដែលព្រះតេជគុណ ប៊ុត ប៊ុនតិញ ស្ថាបនិកបណ្តាញព្រះសង្ឃឯករាជ្យដើម្បីយុត្តិធម៌សង្គម និងលោក ប៉ា ងួនទៀង នាយកមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យមិនមានវត្តមាននៅក្នុងប្រទេស។
ក៏ប៉ុន្តែមុនពេលដីកានេះត្រូវបានបែកធ្លាយជាសាធារណៈកាលពីម្សិលមិញ តាមរយៈសារព័ត៌មាន FreshNews ដែលស្និទ្ធនឹងរដ្ឋាភិបាលលោក តុលា បានចាកចេញពីប្រទេសកម្ពុជាហើយកាលពីថ្ងៃទី ១៦ ខែមករាដោយធ្វើដំណើរទៅប្រទេសថៃតាមយន្តហោះ។ នេះបើតាមការបញ្ជាក់របស់សមត្ថកិច្ចនៅច្រកព្រលានយន្តហោះអន្តរជាតិភ្នំពេញដែលសុំមិនបញ្ចេញឈ្មោះដោយលោកនិយាយថា៖ «គាត់ចេញទៅថៃតាំងពីថ្ងៃ ១៦ មករាតាមជើងយន្តហោះ PG 930 ទៅកាន់បាងកកប្រទេសថៃ តែបន្តដំណើរទៅណាទៀតយើងមិនដឹងទេ»។
ព្រះតេជគុណ ប៊ុត ប៊ុនតិញ ដែលបច្ចុប្បន្នកំពុងស្ថិតនៅសហរដ្ឋអាមេរិកបានប្រាប់ភ្នំពេញប៉ុស្តិ៍កាលពីម្សិលមិញថា៖ «តុលាការបង្កើតរឿងនេះឡើង ហើយពួកគេព្យាយាមកាត់ទោសពួកយើង។ យើងមិនអាចទទួលយកបានទេ ករណីដែលត្រូវប្រឌិតឡើងដូច្នេះ។ វាជារឿងអយុត្តិធម៌ និងគ្រាន់តែជាល្បែងប៉ុណ្ណោះ»។
ព្រះអង្គបន្តថា៖ «គេចង់បង្កើតបញ្ហាបែបនេះហើយព្យាយាមបិទចោលក្រុមអ្នកឯករាជ្យក្នុងប្រទេសនេះ»។
ចំណែកលោក ប៉ា ងួនទៀង មិនអាចទាក់ទងសុំអធិប្បាយបានទេកាលពីម្សិលមិញ។
ទាក់ទងនឹងការប្តឹងប្ដល់របស់លោក ពេជ្រ ស្រស់ ដែលមិនជាប់សាច់ឈាមអ្វីសោះជាមួយលោក កែម ឡី នោះអ្នកស្រី ប៊ូ អ៊ីម៉ូលីតា ត្រូវជាបងស្រីរបស់ភរិយា លោក កែម ឡី មានចម្ងល់ហើយបានចោទសួរថាហេតុអ្វីបានជាប្រធានគណបក្សយុវជនកម្ពុជារូបនេះឈឺឆ្អាលរឿងនេះជាងសាច់ញាតិរបស់សព។
អ្នកស្រី អ៊ីម៉ូលីតា ថ្លែងថា៖ «លោក (ព្រះសង្ឃ ប៊ុត ប៊ុនតិញ) អត់បានកាន់លុយហ្នឹងទេ ហើយលោក ពេជ្រ ស្រស់ ហ្នឹងក៏គ្មានសិទ្ធិអីដែរ។ គ្មានជាប់សាច់ញាតិគ្មានជាប់ពាក់ព័ន្ធក្នុងគ្រួសារខ្ញុំបន្តិចឡើយដូច្នេះគ្មានសិទ្ធិទេ។ អ្នកកាន់លុយមានតែប្រពន្ធលោកបណ្ឌិត កែម ឡី និងម្តាយគាត់ទេ។ គណៈកម្មការគ្រាន់តែឈរឈ្មោះដើម្បីដឹងឮអ្នកណាកាន់បច្ច័យ ប៉ុន្តែពួកគាត់ មិនបានកាន់លុយទេ ហើយក៏អត់បានលុយទេ»។
អ្នកស្រីបន្តថា ៖ «គាត់ (ពេជ្រ ស្រស់) គ្មានសិទ្ធិអីទេ ហេតុអីមកលូកដៃក្នុងរឿងនេះក្នុងគ្រួសារគេអត់មានប្តឹងផង គាត់ត្រូវការអីមកលូកដៃប្តឹង? តុលាការមិនត្រូវកាន់ជើងដែរ ម៉េចក៏មិនវែកញែកទៅថា ពេជ្រ ស្រស់ ហ្នឹងមានអីជាប់ពាក់ព័ន្ធនឹងគ្រួសារគេ?»។
លោកស្រី ណាលី ពីឡូក នាយិកាអង្គការសិទ្ធិមនុស្សលីកាដូបានថ្លែងយ៉ាងខ្លីថាលោកស្រីមាន «ការភ្ញាក់ផ្អើល» ចំពោះបទចោទប្រកាន់នេះ។
លោក Phil Robertson នាយករងនៃអង្គការឃ្លាំមើលសិទ្ធិមនុស្សអន្តរជាតិ Human Rights Watch បានថ្លែងប្រាប់ភ្នំពេញប៉ុស្តិ៍កាលពីម្សិលមិញថា ការចោទប្រកាន់នេះមិនសមហេតុផលហើយជាឧទាហរណ៍យ៉ាងច្បាស់ថ្មីមួយទៀតអំពីការធ្វើទុក្ខបុកម្នេញតាមផ្លូវច្បាប់ដែលជំរុញទឹកចិត្តដោយអ្នកនយោបាយដែលមិនដឹងអ្វីសោះអំពីលោក កែម ឡី ។
លោកនិយាយថា៖ «ទាំងអស់នេះគឺជាការខិតខំប្រឹងប្រែងរបស់ ពេជ្រ ស្រស់ ដើម្បីទទួលបានរង្វាន់ពីគណបក្សប្រជាជនកម្ពុជា ហើយបើសិនជាតុលាការអនុញ្ញាតឲ្យគេប្រើប្រាស់ខ្លួនតាមរបៀបនេះ វាអាក្រក់ខ្លាំងជាងអ្វីដែលគេធ្លាប់បានគិត។ ផ្លូវដែលនាំទៅរកយុត្តិធម៌តែមួយគត់គឺផ្តន្ទាទោស ពេជ្រ ស្រស់ ដោយសារតែការដាក់ពាក្យបណ្ដឹងក្លែងក្លាយនេះហើយបំផ្លាញពេលវេលារបស់តុលាការ»។
លោក Robertson បន្តថា៖ «បើសិនរដ្ឋាភិបាលអនុញ្ញាតឲ្យរឿងក្តីកំប្លែងនេះបន្តទៅមុខទៀតនេះសបញ្ជាក់ថាពួកគេកំពុងផ្តោតគោលដៅលើបុគ្គលិកអង្គការផ្សេងទៀតដែលបានធ្វើឲ្យពួកគេមានបញ្ហាកាលពីអតីតកាល»៕
Fri, 19 January 2018
Aucun commentaire:
Enregistrer un commentaire