ក្រុងវ៉ាស៊ីនតោន: អគ្គលេខាធិការរបស់អង្គការសហប្រជាជាតិលោក Antonio Guterres បានអំពាវនាវកាលពីថ្ងៃអាទិត្យឲ្យមានខិតខំជាថ្មីមួយទៀតដើម្បីបញ្ចប់សង្គ្រាម«ឡប់ៗនិងល្ងីល្ងើ»នៅយេម៉ែនដោយបានលើកឡើងថា លោកមានក្តីសង្ឃឹមថារដ្ឋការរបស់លោកត្រាំអាចដាក់សម្ពាធលើអារ៉ាប៊ីសាអ៊ូឌីតដើម្បីបន្ធូរបន្ថយនិងដោះស្រាយវិបត្តិមនុស្សធម៌នៅទីនោះ។
លោកបានថ្លែងនៅលើកញ្ចក់ទូរទស្សន៍ CNNថា៖«ខ្ញុំមានជំនឿថានេះគឺជាសង្គ្រាមឡប់ៗ។
ខ្ញុំគិតថាសង្គ្រាមនេះប្រឆាំងទៅនឹងផលប្រយោជន៍របស់អារ៉ាប៊ីសាអ៊ូឌីត និងអារ៉ាប់រួម (UAE) ហើយនិងផលប្រយោជន៍របស់យេម៉ែន»ដោយបានប្រើប្រាស់ភាសាចំៗបំផុតសម្រាប់ឋានៈជាអ្នកការទូតជាន់ខ្ពស់របស់អង្គការសហប្រជាជាតិ។ លោកបានបន្ថែមថា អ្វីដែលយើងត្រូវការគឺដំណោះស្រាយនយោបាយមួយ»។
ប្រធានាធិបតីអាមេរិកលោកដូណាល់ត្រាំកាលពីថ្ងៃពុធបានឈានមួយជំហានដ៏កម្រមួយនៃការស្នើសុំអំពាវនាវជាសាធារណៈសុំឲ្យសម្ព័ន្ធមិត្តអារ៉ាប៊ីសាអ៊ូឌីតផ្តល់ការអនុញ្ញាតភ្លាមៗឲ្យមានការបញ្ជូនស្បៀងជំនួយមនុស្សធម៌ដ៏សំខាន់ដើម្បីឲ្យបានទៅដល់យេម៉ែនជាឆាកឈុតមួយនៃអ្វីដែលអង្គការសហប្រជាជាតិបានចាត់ទុកថាជាវិបត្តិមនុស្សធម៌ដ៏ធ្ងន់ធ្ងរបំផុតនៅក្នុងពិភពលោកដោយមានក្រុមពលរដ្ឋជាច្រើនកំពុងប្រឈមគ្រោះថ្នាក់នៃគ្រោះទុរភិក្ស។
លោកត្រាំខណៈមិនបានសុំឲ្យមានការបញ្ចប់សង្គ្រាមទំលាក់គ្រាប់បែកដឹកនាំដោយអារ៉ាប៊ីសាអ៊ូឌីតទៅលើយេម៉ែនបានថ្លែងនៅក្នុងសេចក្តីថ្លែងការណ៍មួយថាក្រុមអ្នកជំនួយការរបស់លោកនឹងស្នើសុំឲ្យអារ៉ាប៊ីសាអ៊ូឌីត«ផ្តល់ការទាំងស្រុងឲ្យមានការបញ្ជូនស្បៀងអាហារគ្រឿងចំហេះទឹកប្រើប្រាស់និងថ្នាំពេទ្យទៅដល់ប្រជាពលរដ្ឋយេម៉ែនដែលមានការខ្វះខាតខ្លាំងនោះ»។
លោក Guterres បានថ្លែងថាលក្ខខណ្ឌនានានៅយេម៉ែនបានមានភាពប្រសើរបន្តិចបន្តួចដោយបានបន្ថែមថា៖«ខ្ញុំសង្ឃឹមថាប្រធានាធិបតីដូណាល់ត្រាំបានដាក់សម្ពាធជាច្រើននាពេលថ្មីៗនេះ។ជំនួយមនុស្សធម៌ជាច្រើនត្រូវបានត្រៀមទុករួចជាស្រេចនឹងត្រូវបញ្ជូនចូល»។ លោកបានថ្លែងថាលោកសង្ឃឹមថាការដាក់បម្រាមពីសំណាក់អារ៉ាប៊ីសាអ៊ូឌីតលើកំពង់ផែនៅយេម៉ែនដែលត្រូវបានដាក់បន្ទាប់ពីកាំជ្រួចមីស៊ីលក្រុមឧទ្ទាមហ៊ូធីត្រូវបានចាប់នៅក្បែរទីក្រុងរីយ៉ាដកាលពីខែមុននឹងត្រូវបន្ធូរបន្ថយឬដកចេញ៕
AFP/ ប្រែសម្រួលដោយ សុឹម សានិតMon, 11 December 2017
Aucun commentaire:
Enregistrer un commentaire