នគរបាលត្រូវបានហ្វឹកហាត់ឲ្យបាញ់កាំភ្លើងគ្រាប់ពិត ដើម្បីត្រៀមការពាររដ្ឋាភិបាល។ រូបថត Fresh News |
ភ្នំពេញៈ កងកម្លាំងនគរបាលរាជធានីភ្នំពេញប្រមាណ ១៥០ នាក់ត្រូវបានហ្វឹកហាត់ឲ្យចេះបាញ់កាំភ្លើងគ្រាប់ពិតជាអ្វីដែលក្រុមមន្ត្រីបានពន្យល់ថា ធ្វើឡើងដើម្បីត្រៀមបង្ក្រាបការតវ៉ាណាមួយដែលអាចកើតឡើងនៅក្រោយការបោះឆ្នោតឆ្នាំ ២០១៨ និងដើម្បីការពាររដ្ឋាភិបាលស្របច្បាប់។
ការហ្វឹកហាត់បាញ់កាំភ្លើងគ្រាប់ពិតនេះត្រូវបានគេមើលឃើញថាធ្វើឡើងតែប៉ុន្មានថ្ងៃប៉ុណ្ណោះក្រោយពីមានការលើកឡើងរបស់លោក វង សូត រដ្ឋមន្ត្រីក្រសួងសង្គមកិច្ចដែលបានថ្លែងឲ្យដឹងថាលោកនាយករដ្ឋមន្ត្រីនឹងប្រើកម្លាំងដើម្បីបង្ក្រាបទៅលើបក្សប្រឆាំង និងអ្នកគាំទ្របក្សប្រឆាំងណាដែលប្រឆាំងទៅនឹងលទ្ធផលនៃការបោះឆ្នោតជ្រើសរើសតំណាងរាស្ត្រឆ្នាំ ២០១៨ ដោយព្រមានវាយ «សំពងក្បាលដោយគល់ឫស្សី» ហើយលោក ហ៊ុន សែន ក៏បានធ្វើការព្រមានថារដ្ឋាភិបាលនឹងប្រើកាំភ្លើង និងគុកដើម្បីទប់ស្កាត់មិនឲ្យមានការតវ៉ាប្រឆាំងលទ្ធផលបោះឆ្នោតដូចឆ្នាំ ២០១៣ ទៀតឡើយ។
លោកវរសេនីយ៍ឯក ព្រំ ចាន់ណា នាយរងសេនាធិការ និងជាមេបញ្ជាការអង្គភាពតម្រួតបទបញ្ជានៃស្នងការដ្ឋាននគរបាលរាជធានីភ្នំពេញបានថ្លែងកាលពីម្សិលមិញនៅក្នុងអំឡុងពេលហ្វឹកហាត់បាញ់កាំភ្លើងប្រើគ្រាប់ពិតថា ការហ្វឹកហាត់បាញ់កាំភ្លើងគ្រាប់ពិតដែលធ្វើឡើងរយៈពេលពីរថ្ងៃក្រោមការបញ្ជាផ្ទាល់ពីនាយឧត្តមសេនីយ៍ ជួន សុវណ្ណ ស្នងការនគរបាលរាជធានីភ្នំពេញនេះគឺសំដៅបង្កើន និងពង្រឹងសមត្ថភាពនៃការប្រើប្រាស់អាវុធ នៅពេលចេញប្រតិបត្តិការដើម្បីទទួលបានជោគជ័យ ហើយដើម្បីធ្វើការការពាររាជរដ្ឋាភិបាលស្របច្បាប់ និងប្រជាពលរដ្ឋ។
លោកថ្លែងថា៖ «ការបាញ់គ្រាប់ពិតនេះគឺដើម្បីពង្រឹងសមត្ថភាពពីព្រោះនៅពេលចេញប្រតិបត្តិការយើងនឹងទទួលបានជោគជ័យហើយបើយើងមិនពង្រឹងសមត្ថភាពនៃការប្រើប្រាស់អាវុធទេ យើងនឹងមិនទទួលបានជោគជ័យទេ។ យើងហ្វឹកហាត់នេះដើម្បីថែរក្សាការពាររាជរដ្ឋាភិបាលស្របច្បាប់ និងប្រជាជន»។
លោក ចាន់ណា បានបន្ថែមថាការហ្វឹកហាត់បាញ់កាំភ្លើងគ្រាប់ពិតនេះមានកម្លាំងនគរបាលផ្នែកអន្តរាគមន៍ប្រមាណ ១៥០ នាក់នៃស្នងការដ្ឋាននគរបាលរាជធានីភ្នំពេញចូលរួមដែលបានចាប់ផ្តើមហ្វឹកហាត់កាលពីម្សិលមិញ ហើយនឹងត្រូវបញ្ចប់នៅថ្ងៃនេះ។ ការហ្វឹកហាត់នេះបានធ្វើឡើងនៅក្នុងបរិវេណអង្គភាពតម្រួតបទបញ្ជាត្រពាំងក្រសាំងក្នុងខណ្ឌពោធិ៍សែនជ័យ។ លោក ចាន់ណា បញ្ជាក់ថាការហ្វឹកហាត់នេះ «យើងបាញ់ចំនួនបីកាយវិការគឺបាញ់ក្រាប បាញ់ឈរ និងបាញ់រត់»។
តំណាងរាស្ត្រគណបក្សសង្គ្រោះជាតិលោក ជាម ច័ន្ទនី បានថ្លែងថាការហ្វឹកហាត់កងកម្លាំងដើម្បីពង្រឹងសមត្ថភាពគឺជាការល្អ ប៉ុន្តែរដ្ឋាភិបាលមិនគួរប្រើប្រាស់កងកម្លាំងទៅបង្ក្រាបអ្នកតវ៉ាអហិង្សានោះទេ ហើយនេះគឺជាការគំរាមកំហែងមួយដល់គណបក្សសង្គ្រោះជាតិ និងប្រជាពលរដ្ឋ។
លោក ច័ន្ទនី បញ្ជាក់ថា៖ « ការហ្វឹកហាត់ទោះបីគ្រាប់ពិត ឬគ្រាប់មិនពិតគឺជាភារកិច្ចរបស់កងកម្លាំងទាំងអស់ត្រូវធ្វើជាប្រចាំ ប៉ុន្តែអ្វីដែលកត់សម្គាល់គឺការប្រើប្រាស់កម្លាំង...ពីព្រោះនៅក្នុងសង្គមប្រជាធិបតេយ្យត្រូវតែមានការតវ៉ាហើយនៅពេលប្រើប្រាស់កម្លាំងនេះមកលើបាតុករ និងអ្នកតវ៉ាអហិង្សា វាគឺជាការរំលោភសិទ្ធិអ្នកតវ៉ា។ ខ្ញុំគិតថាប្រជាពលរដ្ឋស៊ាំហើយនឹងពាក្យថាសង្គ្រាម ហើយវាយបាក់ធ្មេញ ហើយនិងពាក្យថាគល់ឫស្សី ទាំងនេះគឺជាការគំរាមកំហែង ប៉ុន្តែប្រជាពលរដ្ឋមិនបាក់ស្មារតីទេ»។
ប៉ុន្តែលោក ខៀវ សុភ័គ អ្នកនាំពាក្យក្រសួងមហាផ្ទៃបានថ្លែងថាការហ្វឹកហាត់កងកម្លាំងដែលបានធ្វើឡើងជាបន្តបន្ទាប់មកដែលមានការបាញ់គ្រាប់ពិតទាំងយោធា និងប៉ូលិសនេះ វាមិនមែនជាការគំរាមទេ។
លោកបញ្ជាក់ថា៖ «ប្រសិនបើពួកគេជាប៉ូលិស ពួកគេត្រូវតែចេះបាញ់គ្រាប់ពិត ប្រសិនបើពួកគេមិនចេះបាញ់ ពួកគេមិនមែនជាប៉ូលិសទេ»។
លោក សុភ័គ បញ្ជាក់ថានៅក្រោយការបោះឆ្នោតឆ្នាំ ២០១៨ កងកម្លាំងសមត្ថកិច្ចនឹងមិនអនុញ្ញាតឲ្យមានការតវ៉ាដូចកាលពីក្រោយការបោះឆ្នោតឆ្នាំ ២០១៣ ទៀតទេ ហើយថា «ទោះបី ២០១៨ និង ២០២៣ គណបក្សប្រជាជននឹងនៅតែបន្តកាន់អំណាច»។
ទោះយ៉ាងណា លោកស្រី Naly Pilorge អនុប្រធានផ្នែកតស៊ូមតិរបស់អង្គការលីកាដូបានថ្លែងថាវាមិនគួរឱ្យជឿទាល់តែសោះប្រសិនបើអង្គភាពអន្តរាគមន៍របស់ប៉ូលិសរាជធានីភ្នំពេញត្រូវបានហ្វឹកហាត់ឲ្យគ្រប់គ្រងហ្វូងមនុស្សដោយប្រើកាំភ្លើងគ្រាប់ពិតមែននោះ។
លោកស្រីបញ្ជាក់ថា៖ «...ការប្រើគ្រាប់កាំភ្លើងពិតដើម្បីហ្វឹកហាត់គ្រប់គ្រងហ្វូងមនុស្សគឺវាផ្ទុយពីអ្វីដែលកម្លាំងប៉ូលិសអន្តរាគមន៍បង្ក្រាបបាតុកម្មនៅក្នុងប្រទេសភាគច្រើនផ្សេងទៀតបានអនុវត្ត។ ប៉ូលិសអន្តរាគមន៍គឺជាកម្លាំងសម្រាប់រក្សាសណ្តាប់ធ្នាប់សាធារណៈ និងការពារប្រជាពលរដ្ឋដែលប្រមូលផ្តុំ ឬសម្តែងការតវ៉ាជាសាធារណៈ»។
លោកស្រី Naly Pilorge បានចោទសួរថា៖ «តើប៉ូលិសកម្ពុជាកំពុងចាត់ទុកប្រជាពលរដ្ឋរបស់ខ្លួនជាសត្រូវរបស់រដ្ឋឬ ខណៈដែលយើងកំពុងឆ្ពោះទៅរកការបោះឆ្នោតជាតិនៅឆ្នាំក្រោយ?»៕ NS
Tue, 8 August 2017
កុំការពារអាក្បត់បាញ់ពលរដ្ឋខ្មែវើយ!
RépondreSupprimer