ក្រុមពលរដ្ឋក្នុងពេលតវ៉ារឿងទំនាស់ដីពីម្សិលមិញ។ |
ភ្នំពេញៈ ក្រុមហ៊ុនហ្វារអ៊ីស្ដប្រូដខាសធីងខេមបូឌា (FEBC) កាលពីម្សិលមិញត្រូវពលរដ្ឋ ៩ គ្រួសារនៅសង្កាត់គោករកាចោទថាបានជួលមន្ដ្រីមានអាវុធមកគំរាមសម្លាប់ និងបានចាប់បង្ខាំងពលរដ្ឋ ១០ នាក់ទុកក្នុងទីតាំងដីជម្លោះ ខណៈកំពុងតវ៉ា ប៉ុន្តែត្រូវក្រុមហ៊ុនចោទវិញថាពលរដ្ឋក្លែងឯកសារបង្កបញ្ហា ។
ការចោទគ្នាទៅវិញទៅមកនេះបន្ទាប់ពីភាគីទាំងពីរមានជម្លោះលើផ្ទៃដីស្រែទំហំជាង ៤ ហិកតានៅភូមិ ភ្លូផ្អែម សង្កាត់គោករកា ខណ្ឌដង្កោ រាជធានីភ្នំពេញជាច្រើនឆ្នាំមកហើយ ប៉ុន្ដែបានកក្រើកឡើងវិញចាប់ពីថ្ងៃបោះឆ្នោតថ្ងៃទី ៤ ខែមិថុនាថ្មីៗនេះ។
លោក អៀម ជឿន អាយុ ៣៨ ឆ្នាំដែលថាជាម្ចាស់ដីបានថ្លែងថាដីនេះជាកម្មសិទ្ធិពួកគាត់ ៩ គ្រួសារតាំងពីឆ្នាំ ១៩៧៩ មក ប៉ុន្តែក្រុមហ៊ុនខាងលើសុំទិញកាលពីឆ្នាំ ១៩៩៨ ដោយកក់ប្រាក់មួយគ្រួសារ ៣ ម៉ឺនរៀល ប៉ុន្ដែភាគីទាំងពីរមិនទាន់បានធ្វើលិខិតផ្ទេរកម្មសិទ្ធិតាមច្បាប់ទេ។
លោកបានបន្ដថាពួកគាត់បានរង់ចាំចុះកិច្ចព្រមព្រៀងផ្ទេរកម្មសិទ្ធិម្ដងហើយម្ដងទៀតរហូតអ្នកខ្លះបានទៅសួរតំណាងក្រុមហ៊ុន តែគេមិននិយាយអ្វីទាំងអស់ផ្ទុយទៅវិញគេបានលួចធ្វើឯកសាថ្មី (ប្លង់ថ្មី) រួចលក់ឱ្យក្រុមហ៊ុនបុរីពិភពថ្មីរបស់លោកឧកញ៉ា ហុង ពីវ ខណៈពលរដ្ឋបានឯកភាពលក់ទៅឱ្យលោកឧកញ៉ា សុខ ហេង ដែលជាអ្នកទិញថ្មី។
ម្ចាស់ដីម្នាក់ទៀតអ្នកស្រី ម៉ៅ ថុន អាយុ ៦៣ ឆ្នាំបានឱ្យដឹងថានៅឆ្នាំ ២០១៤ ភាគីទាំងពីរបានប្ដឹងគ្នាទៅតុលាការហើយតុលាការបានសម្រេចឱ្យពលរដ្ឋឈ្នះតែក្រុមហ៊ុនបានប្ដឹងឧទ្ធរណ៍ ប៉ុន្ដែខណៈឧទ្ធរណ៍នៅមិនទាន់បើកសវនាការផងស្រាប់តែក្រុមហ៊ុនមកឈូសឆាយដីរួចលក់ទៅឱ្យលោកឧកញ៉ា ហុង ពីវ វិញ ។ លុះដឹងរឿងនេះពលរដ្ឋបាននាំគ្នាមកតវ៉ានៅមុខដីនោះកាលពីថ្ងៃទី ៤ មិថុនា។
លោក អៀម សាន អាយុ ៦៣ ឆ្នាំជាម្ចាស់ដីម្នាក់ទៀតថ្លែងថាក្រុមហ៊ុនបានហៅកងកម្លាំងអាវុធហត្ថខណ្ឌព្រែកព្នៅមកចាប់ពួកគាត់ ១០ នាក់ចាក់សោបង្ខាំងទុកនៅក្នុងដីដែលព័ទ្ធដោយរបងនោះហើយបានប្រើពាក្យគំរាមបាញ់សម្លាប់ចោលទៀតផង។
លោកបានបញ្ជាក់ថា៖ «សន្ដិសុខ និងមន្ដ្រីកងរាជអាវុធហត្ថជិត ១០០ នាក់មានទាំងកាំភ្លើង និងដំបងឆក់បានមកបង្ក្រាបពួកគាត់ដោយបានបិទផ្លូវមិនឱ្យចេញចូលដីទំនាស់ឡើយ។
ប៉ុន្ដែលោក សួន សំអឿន នាយប៉ុស្ដិ៍នគរបាលគោករកាបានថ្លែងថាបញ្ហាជម្លោះដីនោះមិនមានការប៉ះទង្គិចគ្នាទេគឺគ្រាន់តែមានការស្រែកខ្លាំងៗដាក់គ្នាប៉ុណ្ណោះ។
លោកបន្តថា៖ «ពលរដ្ឋបានចូលទៅក្នុងដីនោះហើយក្រុមសន្ដិសុខបានប្រាប់ឱ្យពួកគេចេញវិញ»។
ប៉ុន្តែបើតាមមេធាវីក្រុមហ៊ុនហ្វារអ៊ីស្ដប្រូដខាសធីង ខេមបូឌា (អេហ្វអ៊ីប៊ីស៊ី) លោក ចាន់ សំបូរ បានឱ្យដឹងថាដីនេះក្រុមហ៊ុនបានទិញចាប់តាំងពីឆ្នាំ ១៩៩៩ ដោយមានឯកសារប្លង់រឹងចំនួន ៥ ហើយបានជីកប្រឡាយជុំវិញ និងបានដាំបង្កោលរួចធ្វើអង់តែនវិទ្យុលើដីនោះទៀតផង។
លោកថាករណីកើតឡើងដោយសារមានមេខ្យល់មួយក្រុមបានបំផុសពលរដ្ឋឱ្យតវ៉ាដើម្បីទាមទារវិញដោយបានដាក់បណ្ដឹងទៅតុលាការ ប៉ុន្ដែតុលាការបានសម្រេចឱ្យក្រុមអ្នកតវ៉ាឈ្នះ។
លោកថា៖ «បន្ទាប់ពីដឹងរឿងនេះខ្ញុំបានសរសេរលិខិតមួយទៅក្រសួងដែនដីនគរូបនីយកម្មហើយក្រសួងបានចុះស្រាវជ្រាវដោយបានរកឃើញភាពមិនប្រក្រតីហើយចោទថាមានការឃុបឃិតគ្នាជាប្រព័ន្ធរវាងប្រជាជនមេខ្យល់ និងអាជ្ញាធរមូលដ្ឋានបានចេញប័ណ្ណក្លែងក្លាយនេះឡើង។
លោកថាករណីនេះតុលាការកាត់ក្ដីមានភាពមិនប្រក្រតីហើយក្រោយពីឈ្នះក្ដីមានជនខិលខូចបានលួចធ្វើប័ណ្ណ ឬប្លង់ក្លែងក្លាយជាន់លើប្លង់រឹងរបស់ក្រុមហ៊ុន។
លោកបញ្ជាក់ថា៖ «បើពលរដ្ឋថាជាដីរបស់ពួកគាត់សូមយកឯកសារត្រឹមត្រូវតាមច្បាប់មកបង្ហាញខ្ញុំផង។ រឿងនេះខ្ញុំមានឯកសារគ្រប់គ្រាន់ហើយខ្ញុំមិនចង់ពួកឱ្យគាត់ដើរប្រកាសថាក្រុមហ៊ុនរំលោភយកដីរបស់គាត់នោះទេ»។
លោក ង៉ែត ពិសិដ្ឋ ជំនួយការលោកឧកញ៉ា ហុង ពីវ ប្រធានក្រុមហ៊ុនបុរីពិភពថ្មីបានឱ្យដឹងដែរថាដីនេះជាដីស្របច្បាប់ តែពលរដ្ឋទាំង ៩ គ្រួសារនោះបន្លំឯកសារ និងចង់បង្កបញ្ហាឱ្យកាន់តែធំ។
លោកថាដំបូងឡើយក្រុមហ៊ុនបុរីពិភពថ្មីគ្រោងទិញដីពីលោកឧកញ៉ា សុខ ហេង ប៉ុន្ដែក្រោយពិនិត្យមើលឯកសារឃើញមិនត្រឹមត្រូវ និងឃើញឯកសារក្រុមហ៊ុនហ្វារអ៊ីស្ដប្រូដខាសធីងច្បាស់លាស់ជាងក៏បានសម្រេចចិត្តងាកមកទិញដីរបស់ក្រុមហ៊ុននេះវិញទៅ។ លោក ពិសិដ្ឋ បញ្ជាក់ថាលុះលោកឧកញ៉ា សុខ ហេង មិនសុខចិត្តក៏បំផុសពលរដ្ឋតវ៉ា។
Thu, 8 June 2017
Aucun commentaire:
Enregistrer un commentaire