ក្រសួងឧស្សាហកម្ម និងសិប្បកម្មបានឲ្យដឹងថានឹងមានវិធានការធ្វើការដកហូតសិទ្ធិកាន់កាប់ដីស្រែអំបិលមកវិញក្នុងករណីដែលម្ចាស់កម្មសិទ្ធិបោះបង់ការផលិតអំបិលក្នុងពេលកំណត់ណាមួយ ឬកែប្រែដីស្រែអំបិលទៅមុខសញ្ញាផ្សេងក្នុងគោលដៅអភិរក្សសម្រាប់ការផលិតអំបិលក្នុងទិសដៅការងារឆ្នាំ ២០១៧។
របាយការណ៍បូកសរុបលទ្ធផលការងាររបស់ក្រសួងឧស្សាហកម្ម និងសិប្បកម្មប្រចាំឆ្នាំ ២០១៦ និងទិសដៅការងារឆ្នាំ ២០១៧ ដែលទទួលបានដោយភ្នំពេញប៉ុស្តិ៍បានឲ្យដឹងថា៖ «ក្រសួងកំពុងពិនិត្យសិក្សាបង្កើតបន្ថែមនូវបញ្ញត្តកម្មពិសេសមួយ ដើម្បីទប់ស្កាត់ការបោះបង់ការផលិតអំបិល និងទុកដីស្រែអំបិលឲ្យនៅទំនេរ ដោយធ្វើការដកហូតសិទ្ធិកាន់កាប់ដីស្រែអំបិលមកវិញ ក្នុងករណីដែលម្ចាស់កម្មសិទ្ធិបោះបង់ការផលិតអំបិលក្នុងពេលកំណត់មួយ ឬកែប្រែដីស្រែអំបិលទៅមុខសញ្ញាផ្សេងវិញ»។
ក្រសួងបាននិងកំពុងខិតខំបង្កើតក្រុមការងារចម្រុះអន្តរក្រសួង-ខេត្ត ធ្វើការសិក្សាកំណត់ឲ្យបានត្រឹមត្រូវនៅតំបន់ការពារសម្រាប់ដីស្រែអំបិលដោយបារម្ភអំពីការបោះបង់ការផលិតអំបិលដោយទុកដីស្រែអំបិលឲ្យនៅទំនេរ ឬកែប្រែដីស្រែអំបិលទៅមុខសញ្ញាផ្សេង។
យោងតាមប្រកាសស្ដីពីការគ្រប់គ្រងអំបិល និងផលិតកម្មអំបិលដែលចុះហត្ថលេខាដោយលោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្មកាលពីថ្ងៃទី ១៧ ខែមីនា ឆ្នាំ ២០១៧ នេះបានកំណត់យន្តការគ្រប់គ្រងស្រែអំបិល ផលិតកម្មអំបិល និងផលិតផលអំបិលនៅទូទាំងព្រះរាជាណាចក្រកម្ពុជា។
សេចក្ដីប្រកាសនេះថ្លែងថា៖ «ប្រកាសនេះមានគោលដៅ ធានានិរន្តរភាពផលិត និងកែច្នៃអំបិល ផ្ដល់ការងារ លើកកម្ពស់កំណើនសេដ្ឋកិច្ចជាតិ និងការការពារសុវតិ្ថភាព និងសុខុមាលភាពសាធារណៈ ទប់ស្កាត់ការបោះបង់ការផលិតអំបិលដោយទុកដីស្រែអំបិលឲ្យនៅទំនេរ ឬកែប្រែដីស្រែអំបិលទៅមុខសញ្ញាផ្សេងដោយអនុវត្តឲ្យមានប្រសិទ្ធភាពក្នុងការចាត់វិធានការទប់ស្កាត់រាល់សកម្មភាពអនាធិបតេយ្យជីកដី ឬចាក់ដីបូមបំពេញនៅតំបន់ដីស្រែអំបិល និងតំបន់មានសក្ដានុពលផលិតអំបិល»។
របាយការណ៍បូកសរុបលទ្ធផលការងាររបស់ក្រសួងឧស្សាហកម្ម និងសិប្បកម្មប្រចាំឆ្នាំ ២០១៦ និងទិសដៅការងារឆ្នាំ ២០១៧ ដែលទទួលបានដោយភ្នំពេញប៉ុស្តិ៍បានឲ្យដឹងថានៅឆ្នាំ ២០១៦ បរិមាណអំបិលទទួលបានប្រមាណជា ១៤៨៨៨០ តោន។
ផ្ទៃដីស្រែអំបិលសរុបរបស់ខេត្តកំពត និងខេត្តកែបមានចំនួន ៤៣៧៩ ហិកតាហើយបានផ្ដល់ការងារជូនប្រជាជនប្រមាណជា ៥០០០ នាក់។
ផ្ទៃដីស្រែអំបិលដែលស្ថិតនៅក្នុងបញ្ញីសារពើភណ្ឌទ្រព្យសម្បត្តិរដ្ឋរបស់អង្គភាពស្រែអំបិលនៃមន្ទីរឧស្សាហកម្ម និងសិប្បកម្មខេត្តកំពតមានចំនួន ៤៨៣,១៤ ហិកតា។
ឡាំ គឹមឡេង អគ្គនាយករងនាយកដ្ឋានសហគ្រាសខ្នាតតូច និងមធ្យមនៃក្រសួងឧស្សាហកម្ម និងសិប្បកម្មបានថ្លែងថារហូតមកដល់ពេលនេះពុំមានព័ត៌មានអំពីកសិករស្រែអំបិលណាម្នាក់បោះបង់ ឬផ្អាកការផលិតនោះទេ។
លោក គឹមឡេង ថ្លែងថា៖ «កសិករគឺគាត់ត្រូវធ្វើអំបិលគាត់មិនអាចធ្វើអ្វីផ្សេងទៀតទេដោយសារគាត់បានធ្វើតាំងពីដូនតាមកមានបុគ្គលមួយចំនួនបានធ្វើសកម្មភាពដើរញុះញង់កុំឲ្យកសិករធ្វើស្រែអំបិល តែរហូតមកដល់ពេលនេះមិនទាន់មាននរណាម្នាក់បោះបង់ដីស្រែអំបិល ឬក៏ផ្អាកធ្វើស្រែអំបិលនោះទេ»។ «ហើយបើសិនជាអ្នកមានដីកម្មសិទ្ធិស្រែអំបិលអ្នកមិនអាចលក់ឲ្យបុគ្គលផ្សេងទៀតដែលមិនធ្វើស្រែអំបិលបានទេ»។
លោក ពៅ សុណ កសិករស្រែអំបិលនៅខេត្តកំពតដែលមានដី ២០ ហិកតាបានថ្លែងថាលោកចង់កែប្រែដីស្រែអំបិលមួយចំនួនដោយសាងសង់ផ្ទះសម្បែងដើម្បីឲ្យកូននៅក្នុងបន្ទុក។
លោក សុណ ថ្លែងថា៖ «តាមពិតខ្ញុំក៏ចង់យកដីមួយចំណែកសាងសង់ផ្ទះដោយសារកូនធំៗតែយើងមិនអាចធ្វើបានទេព្រោះអាជ្ញាធរហាម ហើយជីវភាពអាស្រ័យលើស្រែអំបិលក៏មិនទៀងទាត់ដែរ ឆ្នាំនេះយើងប្រមូលផលបានតិចជាងឆ្នាំមុនហើយតម្លៃអំបិលមិនខ្ពស់ទេ តែយើងធ្វើអីបានចេះតែបន្តធ្វើទៅ យើងគ្មានគម្រោងផ្អាកទេបើទោះបីតម្លៃទាបក៏ដោយ ព្រោះយើងមិនអាចទុកដីឲ្យទំនេរចោលបានទេដោយខ្លាចទទួលរងការពិន័យពីអាជ្ញាធរ»៕
Thu, 20 April 2017
Aucun commentaire:
Enregistrer un commentaire