លោក គឹម សុខ នៅក្នុងឡានពន្ធនាគារនៅពេលត្រូវបានដឹកមកសាលាដំបូងរាជធានីភ្នំពេញកាលពីថ្ងៃម្សិលមិញ។ |
ភ្នំពេញ: អ្នកវិភាគនយោបាយ និងតាមដានព្រឹត្តិការណ៍សង្គមលោក គឹម សុខ ដែលត្រូវបានឃុំខ្លួនតាមបណ្តឹងរបស់លោកនាយករដ្ឋមន្ត្រី ហ៊ុន សែន ពាក់ព័ន្ធពីបទញុះញង់ឱ្យប្រព្រឹត្តបទឧក្រិដ្ឋជាអាទ៍លនៅតែរក្សាចម្លើយ និងទទួលស្គាល់ការវិភាគរបស់ខ្លួននៅវិទ្យុអាស៊ីសេរី នៅចំពោះមុខចៅក្រមស៊ើបសួរសាលាដំបូងរាជធានីភ្នំពេញ ខណៈសាលាឧទ្ធរណ៍បើកសវនាការសំណុំរឿងបណ្តឹងនៅក្រៅឃុំនៅថ្ងៃនេះ។
លោក គឹម សុខ ត្រូវបានចៅក្រមស៊ើបសួរសាលាដំបូងរាជធានីភ្នំពេញលោក រស់ ពិសិដ្ឋ កោះហៅមកសាកសួរបន្ថែមកាលពីម្សិលមិញតាំងពីម៉ោង ២ រសៀលដល់ម៉ោង ៥ ល្ងាចទើបបានបញ្ចប់។
ចៅក្រមស៊ើបសួរនៃសាលាដំបូងរាជធានីភ្នំពេញលោក រស់ ពិសិដ្ឋ បដិសេធអត្ថាធិប្បាយជុំវិញការសាកសួរដោយប្រាប់ភ្នំពេញប៉ុស្តិ៍យ៉ាងខ្លីថា៖ «ខ្ញុំមិនអាចទម្លាយរឿងការសាកសួរទេ ព្រោះជាវិជ្ជាជីវៈរបស់ខ្ញុំ ព្រោះត្រូវការស៊ើបបន្តទៀត»។
ក្រោយពីការសាកសួរអស់ បី ម៉ោងលោក គឹម សុខ មិនបាននិយាយអ្វី ឬស្រែកដូចនៅសាលាឧទ្ធរណ៍នោះទេ។
លោក គឹម សុខ បានថ្លែងថា៖ «គេសួរបំណងរបស់ខ្ញុំដែលអត្ថាធិប្បាយនៅវិទ្យុអាស៊ីសេរី ប៉ុន្តែខ្ញុំអត្ថាធិប្បាយដើម្បីបង្ហាញពលរដ្ឋអំពីការពិត»។
លោក ជូង ជូងី មេធាវីការពារឱ្យលោក គឹម សុខ បានថ្លែងយ៉ាងខ្លីថា៖ «ចៅក្រមបានសួរកូនក្តីពីការវិភាគនៅវិទ្យុអាស៊ីសេរីកន្លងមកថាកូនក្តីព្រមទទួលយក ឬទទួលស្គាល់ថាបាននិយាយអ៊ីចឹងមែន ឬមិនមែន»។ លោកបន្តថាក្រោយការសាកសួរកូនក្តីរបស់លោករក្សាជំហររបស់គាត់ដដែល ហើយទទួលស្គាល់អ្វីដែលគាត់បានវិភាគតាមវិទ្យុអាស៊ីសេរីកន្លងមក។
លោកឱ្យដឹងដែរថាមូលហេតុដែលចៅក្រមចំណាយរយៈពេលសួរយូរដោយសារ «ចៅក្រមប្រើពេលយូរព្រោះចៅក្រមធ្វើការកត់ត្រាចម្លើយរបស់គាត់ច្បាស់លាស់ហើយលោក គឹម សុខ គាត់ពិនិត្យចម្លើយរបស់គាត់ច្បាស់លាស់ ដើម្បីធានាថាការកត់ត្រាចម្លើយរបស់គាត់ត្រឹមត្រូវដូចអ្វីដែលគាត់ផ្តល់ចម្លើយ»។
កាលពីថ្ងៃ ៦ ខែមីនាសាលាឧទ្ធរណ៍បានសម្រេចតម្កល់សាលក្រមរបស់សាលាដំបូងទុកជាបានការក្នុងការឃុំខ្លួនលោក គឹម សុខ។
ក្រោយពីការសម្រេចនេះលោក គឹម សុខ បានស្រែកប្រាប់អ្នកសារព័ត៌មាននៅពេលឡើងរថយន្តពន្ធនាគារថា៖ «ខ្ញុំសូមស្នើទៅនាយករដ្ឋមន្ត្រីឈប់បញ្ជូនមនុស្សទៅឱ្យបញ្ចុះបញ្ចូលខ្ញុំ និងគំរាមដាក់គុកងងឹតខ្ញុំដើម្បីជាថ្នូរនឹងការដោះលែងហើយមួយវិញទៀតគេឱ្យខ្ញុំសរសេរលិខិតសុំទោសជាថ្នូរនឹងការឱ្យនៅក្រៅឃុំ ខ្ញុំមិនធ្វើបែបនេះទេ ខ្ញុំមិនក្បត់ពលរដ្ឋទេសូមលោកមេត្តាក្លាហានមកតតាំងគ្នាក្នុងតុលាការ»។ ប៉ុន្តែលោក គី តិច មេធាវីការពារក្តីឱ្យលោក ហ៊ុន សែន បានចាត់ទុកការថ្លែងរបស់លោក គឹម សុខ ថាជាការមួលបង្កាច់ និងទម្លាក់កំហុសមកលើកូនក្តីរបស់លោក។
ក្រោយមកនៅថ្ងៃទី ២០ ខែមីនាអគ្គនាយកដ្ឋានពន្ធនាគារនៃក្រសួងមហាផ្ទៃបានចេញលិខិតបំភ្លឺដោយបានលើកឡើងថាការថ្លែងរបស់លោក គឹម សុខ ខុសពីការពិត និងឆ្លៀតឱកាសវាយប្រហារប្រមុខរដ្ឋាភិបាលដោយគ្មានមូលដ្ឋាន។
ក្នុងលិខិតបានបញ្ជាក់ថា «មណ្ឌលអប់រំកែប្រែទី ១ បានអនុញ្ញាតឱ្យលោក គឹម សុខ ជួបជាមួយមេធាវីការពារក្តីចំនួន ៣ លើក និងក្រុមគ្រួសារចំនួន ១ លើកផងដែរហើយបើមានការគំរាមកំហែងណាមួយពីសំណាក់ជនជាប់ឃុំដូចគ្នា ឬជនណាក្នុងដែនសមត្ថកិច្ចរបស់ពន្ធនាគារលោក គឹម សុខ គួររាយការណ៍ផ្ទាល់ដើម្បីរួមគ្នាដោះស្រាយ»។
លោក គឹម សុខ ត្រូវបានចៅក្រមសាលាដំបូងរាជធានីលោក រស់ ពិសិដ្ឋ សម្រេចឃុំខ្លួនកាលថ្ងៃទី ១៧ ខែកុម្ភៈដោយចោទពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបរិហារកេរ្តិ៍ជាសាធារណៈតាមបណ្តឹងរបស់លោកនាយករដ្ឋមន្ត្រី ហ៊ុន សែន៕
Wed, 22 March 2017
Aucun commentaire:
Enregistrer un commentaire